Oviṋa avihe Ovafarisei mbyaave tjiti aave tjitire okuritjatisa kovandu. Indu tji va tjiti ouwa, aave tjiti kutja varwe ve mune. Owo aave kumbire momivanda vyotjihuro kokutja ovandu ve ve mune. Ovafarisei aave rihongo ozongumbiro ozonde moviuru nu ave kumbire mozondjuwo mu mu wongarera ombongo na momivanda kutja varwe ve ve zuve. Okutja ovandu va himinwe indu Jesus tja tja: ‘Amu kara otja Ovafarisei. Owo ve nangarasi Mukuru u tjaterwa tji mave ungurisa omambo omengi tji mave kumbu, posiya katjiperi. Ongumbiro otjiṋa tjopokati koye na Jehova. Tji mamu kumbu amu hungire omambo yemwe povikando ovingi. Jehova u vanga kutja ove u mu raere oviṋa mbi ri momutima woye.’

 ‘Mu sokukumba nai: “Tate yetu ngu u ri momayuru: Ena roye ngari yapurwe; ouhona woye ngau ye; ombango yoye ngai tjitwe na kombanda yehi otja meyuru.”’ Jesus wina we ve raera kutja ngave kumbire ovikurya vyeyuva arihe, omauvi wawo okuisirwa, noviṋa vyarwe mehupo.

Jesus wa tja: ‘Amu isa okukumba. Aruhe ningireye oviṋa oviwa ku Iho, Muhona. Omunene auhe u vanga okuyandja oviṋa oviwa komuatje we. Indu omuatje woye tje ku ningire omboroto mo mu pe ewe po? Indu tja ningire ehundju mo mu pe onyoka?’

Okuzambo Jesus wa kahurura omaheero wepu ndi na tja: ‘Neṋe tji mu tjiwa okuyandja oviṋa oviwa kovanatje veṋu, okutja Tate weṋu Jehova wina me mu pe ombepo ondjapuke. Ove mo sokumuningira uriri.’ Ove mo puratene kondunge yaJesus po? Ove u kumba ohunga natjike?