Orang Parisi ngereja utai ngambika dipuji. Enti sida ngereja utai ti manah, sida ngereja nya ngambika dipeda orang. Sida besampi ba endur orang mayuh ngambika semua orang ulih meda sida. Orang Parisi ngapal leka sampi ti panjai lalu ngulang sampi nya ba balai gempuru sereta teluk jalai ngambika orang ulih ninga sida. Nya alai, mayuh orang tekenyit lebuh Jesus madah ngagai sida: ‘Anang besampi baka orang Parisi. Sida ngumbai Petara rinduka sida laban nyebut mayuh leka jaku, tang Iya enda rindu. Sampi nya entara nuan enggau Jehovah. Anang ngulang utai ti sama. Jehovah deka nuan madah utai ke ba ati nuan.

 ‘Baka tu chara kita patut besampi: “Apai kami ti di serega: Kudus meh nama Nuan. Datai meh Perintah Nuan. Nyadi meh peneka Nuan di dunya enggau di serega.”’ Jesus mega madahka sida patut besampika pemakai ke sehari nya, dosa diampunka, sereta utai bukai ke bekaul enggau pengidup sida.

Ku Jesus: ‘Anang ngetu besampi. Terus minta Apai kita Jehovah utai ti manah. Tiap iku apai indai deka meri utai ti manah ngagai anak sida. Enti anak nuan minta ruti, kati nuan meri iya batu? Enti iya minta ikan, kati nuan meri iya ular?’

Udah nya Jesus nerangka utai ti dipelajar: ‘Enti kita nemu meri utai ti manah ngagai anak kita, Apai kita Jehovah tentu nemu agi meri roh kudus ngagai kita. Nya alai, terus meh minta ari Iya.’ Kati nuan nitihka jaku ajar Jesus? Nama utai ke disampika nuan?