Ahwo Farisi a jẹ hai ru eware re amọfa a ruẹ e rai. A te bi ru oware uwoma kẹ ohwo, a rẹ gwọlọ jọ iraro amọfa ru ei. A rẹ lẹ evaọ oria nọ ohwo kpobi ọ sai jọ ruẹ e rai. A jẹ hae wuhrẹ elẹ ithethei fihọ uzou, je dhe ae ẹwẹwariẹ evaọ iwou-egagọ gbe iyẹrẹ, eria nọ ahwo a rẹ jọ ruẹ e rai. Fikiere u gbe ahwo na unu gaga nọ Jesu ọ ta nọ: ‘Wha lẹ wọhọ ahwo Farisi hi. A roro nọ Ọghẹnẹ o ti yo elẹ rai fiki eme ibuobu rai, rekọ Ọghẹnẹ o re yo elẹ itieye he. Olẹ yọ ẹme ohwo avọ Jihova ọvo. Wha dhe eme evona ẹwẹwariẹ hẹ. Jihova ọ gwọlọ nọ whọ ta oware nọ ọ rrọ owhẹ eva kẹe.

‘Enẹ wha rẹ lẹ: “Ọsẹ mai nọ ọ rrọ obọ odhiwu, jọ odẹ ra o jọ fuafo. Jọ Uvie ra o ze. Jọ a jọ otọakpọ na ru oreva ra wọhọ  epanọ o rrọ obọ odhiwu.”’ Jesu ọ tẹ jẹ ta kẹ ai nọ a lẹ kẹ emu okpẹdẹ avọ erọvrẹ izieraha rai, gbe eware efa nọ a gwọlọ.

Jesu ọ ta nọ: ‘Wha hae lẹ ẹsikpobi. Wha hai lẹ se Jihova Ọsẹ rai, re ọ kẹ owhai eware iwoma. Ọsẹgboni kpobi ọ rẹ gwọlọ kẹ emọ riẹ emamọ eware. Ọmọ ra ọ tẹ yare owhẹ ibrẹdi, kọ whọ te kẹe utho? Ọmọ ra ọ tẹ yare owhẹ emeri, kọ whọ te kẹe araomuomu?’

Jesu ọ ta oware nọ ma rẹ sai wuhrẹ no ẹme na ze inọ: ‘Wha tẹ riẹ epanọ wha rẹ rọ emamọ eware kẹ emọ rai, ẹvẹ Ọsẹ rai Jihova ọ rẹ rehọ ẹzi ọfuafo kẹ enọ e be yare iẹe te? Thakpe yare iẹe ọvo.’ Kọ who bi ru lele ohrẹ Jesu na? Eware vẹ whọ be hae yare Jihova nọ whọ tẹ be lẹ?