Hparishe ni galaw ai lam yawng mayawng gaw masha ni yu kaba na matu sha re. Lama na matsan dum myit madun yang, dai mung masha ni sadi hkrup na matu galaw ai re. Shanhte gaw masha law law nga ai shara hkan, masha ni mu hkra akyu hpyi ma ai. Tara jawng ni, lam nmaw hkan hta matsing sumhting da ai akyu hpyi ga galu galang hpe nsen ja ja hte kahtap htap hpyi ma ai. Dai majaw, shanhte gaw Yesu ndai hku tsun ai shaloi grai mau mat ma ai: ‘Hparishe ni zawn akyu hkum hpyi mu. Karai Kasang gaw ga si law law hte ga galu galang tsun yang she ra sharawng ai nga nna shanhte shadu ma ai. Raitim, dai hku n re ai. Akyu hpyi ai gaw nang hte Yehowa a lapran na lam sha re. Ga hkum langai hpe kahtap htap hkum hpyi. Yehowa gaw nanhte a kraw hta gara hku hkamsha nga ai hpe tsun dan na matu sha ra sharawng ai.’

 ‘Nanhte ndai hku akyu hpyi mu: “Sumsing lamu na anhte a Wa e, Na a amying nsang chyoi pra nga lit ga; Na a mungdan du wa ru ga; Lamu tang hta, na a myit dik nga ai hte maren, ga ntsa e mung, dik lit ga law.”’ Dai ni sha na lusha jaw sha na matu, mara ni raw ya na matu hte tinang ra kadawn ai kaga lam ni a matu akyu hpyi mai ai lam mung shanhte hpe Yesu tsun dan ai.

Yesu ndai hku tsun ai: ‘Galoi mung akyu hpyi nga mu. Kaja ai ni jaw na matu, Wa Yehowa hpe matut nna akyu hpyi nga mu. Kanu kawa yawng gaw tinang a kasha hpe kaja ai sha jaw mayu ai. Kasha gaw muk hpyi yang nlung jaw na kun? Nga hpyi yang lapu jaw na kun?’

Dai ga tsun ngut ai hpang, Yesu ndai hku sanglang dan ai: ‘Nanhte gaw tinang a kasha ni hpe kaja ai sha jaw mayu yang, Wa Yehowa mung dai hta grau nna chyoi pra ai wenyi jaw na re. Nanhte akyu hpyi na matu sha ra ai.’ Yesu tsun ai hpaji jaw ga hku nang akyu hpyi nga ai kun? Akyu hpyi ai shaloi gara lam ni hpyi ai kun?