Obuli kindu ekya Bafarisayo bakolha, ibakakikolha busana n’eritsemesya abandu. Ibakabya bamakolha ekindu ky’olhukeri, ibakakikolha erianza abandu babalhangire. Ibakasabira ahali abandu nuku obuli mundu abalhangire. Abafarisayo ibakahambira emisabe miri-miri y’omwa mithwe yabu kandi ibakasubirira muyo omwa sinagogi n’okwa syonzira aho abandi babya ibangana bowa. Neryo abandu mubasweka Yesu akababwira athi: ‘Isi mwasaba ng’Abafarisayo. Bakalengekanaya bathi Nyamuhanga akendi batsemera busana n’ebinywe byabu bingyi, aliwe syali tsema. Omusabe ni wawu na Yehova. Isiwasubirira omwa binywe bighumerera. Yehova akanza iwamubwira eriyowa lyawu.

 ‘Neryo mutholere imwasaba muthi, Thatha wethu oyuli elhubulha, erina lyawu libye libuyirire. Obwami bwawu bwase. Erisonda lyawu liyirawe omwa kihugho ngoku liri omwa lhubulha.’ Yesu kandi mwababwira athi ibasaba busana n’akalyo k’obuli kiro, ebibi byabu erighanyirwa, n’ebibali bwagha.

Yesu mwabugha athi: ‘Isi mwaleka erisaba. Mulhole embere erisaba Thatha wenyu Yehova eribaha ebindu ebyuwene. Obuli mubuthi akanza iniaha omwana wiwe y’ebyuwene. Omwana wawu amakusaba omuggati, wangana muha eribwe? Amakusaba erihere, wangana muha enzoka?’

Neryo Yesu mwasoborera erisomo eriri omwa binywe ebyo athi: ‘Wamabya iwunasi eriha abaana bawu b’ebyuwene, ibbwa Thatha wawu Yehova, syalhabire aho erikuha omulimu abuyirire? Ekya wutholere erikolha ly’erimusaba.’ Wukana kwama erihabulha lya Yesu eri? Ni binduki ebya wukasaba?