Nyɛ o nyɛ Falisiiya ndaa tosa pɛ, ndaa yeema mi waŋnda muli nda hɔlteŋ kɔɔli. Kɛndɛi bɛɛ ndaa tosal waŋndo pɛ, ndaa yeema mi waŋnda ndaa sina a ndi okɔɔ. Mi ndaa piɛi o fondaŋ nda waŋnda wa tau laŋ, le halikpeŋ mi waŋnda che nda. Mi Falisiiya ndaa loonuŋ piɛile vilɛi vilɛileŋ, okoŋ te a kuɛ niŋ pɛ o chiɛila Chuuwa piɛi Mɛlɛkalaŋ niŋ a o nɛilaŋ, a miŋgi sondoo lechoo le halikpeŋ mi waŋnda wa nda tueiyɔɔ. Mi kɔndɔfillo bii waŋnda mɛɛ Chiisu dimul nda aa: ‘La piɛi maa Falisiiya le. A yiyaŋ ko maa Mɛlɛka cho kɔl hini a nda te a soo pɛ tau. Kɛ o hini kɔl a piɛile waa lende le. Piɛileŋ le nɔ mi le wa num nya Chɛhowa tɛɛŋ kinɛi. A nɔ ma wa sondoo miŋgioo o nyɛpilɔɔ choo le diiŋ diiŋ te. Chɛhowa yeema num ma dimul ndu nyɛ cho num o kɔl kpeekpeiyo.

 ‘Te la wa piɛileŋ pɛ, la dimi aa: “Finya naa o choo choo niŋ, maa diola numndaŋ la wa la diandaa. Maa Masale numndeŋ le huŋ. Maa hɛnaŋ numndo tosaŋ o choo choo niŋ a o lɛŋndeŋ choo.”’ Mi Chiisu pɛɛku nda vɛlɛ le ma piɛi le nyɛdiaa nda dia o paaleŋ niŋndo, le mi Mɛlɛka mal nda haki le hakilaŋ ndalaŋ, a le bahawɛila ndala cheleŋ ndaŋ.

Mi Chiisu dimul nda aa: ‘La pɛŋgi piɛileŋ te. La hiou lachi a Chɛhowa Finya nya nyunaa le sɔɔŋ kɛndɔŋ o piɛileŋ niŋ. Kala chua kɛ kɛ yeema mbo ke po ndɔɔ ɔɔ chua ndɔɔ nyɛm kɛndɔŋ. Te po numndo nyuna num pɛ le beediiyo, baa pouwo ŋ cho ndu ke ni? Te o nyuna num pɛ le suuwo, baa kɛuwo ŋ cho ndu ke ni?’

Mi Chiisu tɛɛsiaa nyɛ naŋ pɛɛku o hei niŋndo: ‘Te a sina pɛ mɛɛ ŋ ke chuauwaa numnda nyɛm kɛndɔŋ yɛ, ɔɔ niŋ Chɛhowa Finya num, baa o nɔla mbo ke num nyina diandaa le? Nyɛ ŋ nɔ ma tosa kinɛiyo cho ni, nyuna ndu o piɛileŋ niŋ.’ A cho pa sila Chiisu wo tolɔɔ kɔɔli? Nyɛm suu kuɛɛ ŋ nɔ yɛ ma nyuna le muŋ o piɛileŋ niŋ?