တၢ်မၤလိ ၈၂
ယ့ၣ်ၡူးသိၣ်လိအပျဲၢ်အဘီၣ်တဖၣ် ဘၣ်ဃးဒီးတၢ်ထုကဖၣ်အဂ့ၢ်
ကယဲၢ်တၢ်လၢပှၤဖၤရံၤၡဲမၤဝဲတဖၣ်န့ၣ် အဝဲသ့ၣ်မၤဝဲဒ်သိး ပှၤဂၤကထံၣ်ဒိၣ်အဝဲသ့ၣ်အဂီၢ်လီၤ. အဝဲသ့ၣ်မ့ၢ်မၤတၢ်လၢ အဂ့ၤတခါခါန့ၣ်အဲၣ်ဒိးဝဲ လၢပှၤဂၤထံၣ်ဝဲလီၤ. အဝဲသ့ၣ်ဃ့ဘါထုကဖၣ်တၢ်လၢ ကမျၢၢ်အမဲာ်ညါဒ်သိး ပှၤကိးဂၤဒဲးကထံၣ်ဝဲအဂီၢ်လီၤ. ပှၤဖၤရံၤၡဲတဖၣ် တိၢ်ရူးဃာ်ဝဲတၢ်ထုကဖၣ်ဒီး ဖဲအဝဲသ့ၣ်ဘါထုကဖၣ်တၢ်လၢ ဘူၣ်ဘျီၣ်ပူၤဒီးလၢကျဲဖီခိၣ်အခါ တဲဝံၤတဲက့ၤဝဲ အတၢ်ကတိၤ ဒ်သိးပှၤဂၤကနၢ်ဟူဝဲအဂီၢ်လီၤ. ဘၣ်ဆၣ် ယ့ၣ်ၡူးအတၢ်ကတိၤန့ၣ် ဒုးကမၢကမၣ်ဝဲပှၤကမျၢၢ်တဖၣ်လီၤ. ယ့ၣ်ၡူးတဲဝဲလၢ– ‘တဘၣ်ဃ့ဘါထုကဖၣ်တၢ်ဒ် ပှၤဖၤရံၤၡဲတဖၣ်အသိးတဂ့ၤ. အဝဲသ့ၣ်ဆိကမိၣ်ဝဲလၢ ကစၢ်ယွၤဘၣ်သူၣ်ဘၣ်သး အဝဲသ့ၣ်အတၢ်ကတိၤလီၤ. ဘၣ်ဆၣ် ကစၢ်ယွၤတဘၣ်သူၣ်ဘၣ်သး ပှၤဖၤရံၤၡဲတဖၣ်အတၢ်ထုကဖၣ်ဘၣ်. နတၢ်ဃ့ဘါထုကဖၣ်န့ၣ် မ့ၢ်တၢ်ရ့လိာ်သးလၢ နၤဒီးယဟိဝၤယွၤ ခံဂၤအဘၢၣ်စၢၤလီၤ. အဃိ ဖဲနဃ့ဘါထုကဖၣ်တၢ်အခါ နတဘၣ် တဲဝံၤတဲက့ၤတၢ်ဘၣ်. ယဟိဝၤယွၤ အဲၣ်ဒိးဝဲလၢနကတဲဖျါထီၣ် တၢ်အိၣ်လၢနသးပူၤလီၤ.
‘နကြၢးဃ့ဘါထုကဖၣ်တၢ်ဒ်အံၤ– “အိၣ်လၢမူခိၣ်ပပၢ်ဧၢ, မ်နမံၤဘၣ်တၢ်ပာ်စီဆှံတက့ၢ်. နဘီနမုၢ်န့ၣ် မ်အဟဲတက့ၢ်. ဒ်လၢမူခိၣ်အသိးန့ၣ် မ်တၢ်မၤအသးလၢ ဟီၣ်ခိၣ်ချၢစ့ၢ်ကီးဖဲဒၣ်နသးတက့ၢ်.”’ ယ့ၣ်ၡူး တဲစ့ၢ်ကီးဝဲလၢ အဝဲသ့ၣ်ကြၢးဃ့ဘါထုကဖၣ်တၢ် ဘၣ်ဃးဒီး တၢ်အီၣ်လၢတနံၤအဂီၢ်တနံၤအဂီၢ်, လၢအတၢ်ဒဲးဘးကပျၢ် ဒီးလၢအနီၢ်ကစၢ် တၢ်လိၣ်ဘၣ်အဂၤတဖၣ်အဂီၢ်လီၤ.
ယ့ၣ်ၡူးတဲကဒီးဝဲလၢ– ‘ဃ့ဘါထုကဖၣ်တၢ်ထီဘိတက့ၢ်. ဆဲးဃ့တၢ်လၢ နပၢ်ယဟိဝၤယွၤအအိၣ် ဒ်သိးကဟ့ၣ်လီၤနၤ တၢ်လၢအဂ့ၤန့ၣ်တက့ၢ်. မိၢ်ပၢ်တဖၣ်စ့ၢ်ကီး အဲၣ်ဒိးဟ့ၣ်လီၤဝဲတၢ်အဂ့ၤလၢ အဖိတဖၣ် အအိၣ်လီၤ. နဖိမ့ၢ်ဃ့အီၣ်ကိၣ်န့ၣ် နကဟ့ၣ်လီၤအီၤလၢလၢၢ်တဖျၢၣ်ဧါ. ဒီးအဝဲသ့ၣ်မ့ၢ်ဃ့နၤလၢ ညၣ်တဘ့ၣ်န့ၣ် နကဟ့ၣ်လီၤအီၤလၢဂုၢ်တဘိဧါ.’
ဝံၤဒီးယ့ၣ်ၡူး တဲနၢ်ပၢၢ်အဝဲသ့ၣ်လၢ– ‘သုမ့ၢ်သးအိၣ်ဟ့ၣ်သုဖိ တၢ်လၢအဂ့ၤန့ၣ် သုပၢ်ယဟိဝၤယွၤသးအိၣ်ဟ့ၣ်လီၤသုလၢ သးစီဆှံအါန့ၢ်အန့ၣ်လီၤ. အဃိ နကဘၣ်ဃ့ဒ်သိး နကဒိးန့ၢ်ဘၣ်သးစီဆှံအဂီၢ်လီၤ.’ မ့ၢ်နမၤပိာ်ထွဲယ့ၣ်ၡူး အတၢ်ဟ့ၣ်ကူၣ်ဧါ. မ့ၢ်နဃ့ဘါထုကဖၣ် ဘၣ်ဃးဒီးတၢ်ဂ့ၢ်မနုၤလဲၣ်.
“ဃ့တၢ်တက့ၢ်, ဒီးတၢ်ကဟ့ၣ်သုလီၤ. ဃုတၢ်တက့ၢ်, ဒီးသုကထံၣ်န့ၢ်တၢ်လီၤ. ဒိတကျိာ်တၢ်တက့ၢ်, ဒီးတၢ်ကအိးထီၣ်န့ၢ် သုဂီၢ်လီၤ.”—မးသဲ ၇:၇
