Hpaˍriˍsehˇ hui mvuhˇ miˬ yaˇ dawˇ cawˇ tuˬ teˇ ceuˬ le le te ve yoˬ. Yawˇ hui shu mawˬ kuiˬ lo daꞈ ve ceh te leh tcuh hkʼaw lo kaꞈ bon lawˬ ve yoˬ. Yawˇ hui shu htaꞈ kaˇ tcuh gaˇ ve pa taw, Yuˇdaꞈ chaw ve hpawnˬ daꞈ kuiˬ hkʼaw bon lawˬ peuˬ kaꞈ lawˬ leh yaꞈ kʼaw hpuiˇ lo kaꞈ bon lawˬ ve yoˬ. Yeˍsuˆ maˍ ve htaꞈ chaw yaˇ anˇ jaˇ. Hpaˍriˍsehˇ hui bon lawˬ ve hkʼe taˇ te. Yawˇ hui bon maw chaweh lawˬ ve htaꞈ Gʼuiˬ sha dawˇ cawˇ ve tehꞈ dawˇ ve yoˬ. Awˬ tehˬ kʼo, Gʼuiˬ sha maˇ dawˇ cawˇ. Bon lawˬ ve teˇ ceuˬ lehˬ, a shu yawˇ hkʼaˇ yawˇ Yaˬhoˉvaˬ geh yaw daꞈ ve hkʼe hpehꞈ ve yoˬ. Tawnˇ gʼaw ve hkʼe taˇ te. Nawˬ hkʼaˬ hkʼe dawˇ ve Yaˬhoˉvaˬ htaꞈ kʼoˆ laˇ tcuh gaˇ ve yoˬ.

“Hkʼe te leh, nawˬ hui bon chi hkʼe lawˬ˗oꞈ. Mvuhˇ naw ma hkʼoˆ chehˇ ve ngaˬ hui ve Awˬ pa˗oˬ, nawˬ ve awˬ meh htaꞈ yawˆ yan te piˇ lawˬ˗oꞈ. Nawˬ ve  mvuhˇ miˬ gaˬ la piˇ˗oˆ. Mvuhˇ naw ma hkʼoˆ lo nawˬ ve a loˍ biˇ ve hkʼe, miˬ guiˬ hkʼoˆ htaꞈ htawˇ biˇ la piˇ˗oˆ.” Yeˍsuˆ mvuhˇ miˬ yaˇ htaꞈ kʼoˆ piˇ ve, teˇ nyi awˬ pon teˇ nyi caˇ tuˬ, venˇ baˆ hpehˇ laˇ tuˬ, leh a shu yawˇ ve awˬ nu ve awˬ lawn kaꞈ lawˬ gʼa ve yoˬ.

Yeˍsuˆ kʼoˆ ve, ‘Awˬ pa Yaˬhoˉvaˬ geh daꞈ ve awˬ ceuˬ gʼa tuˬ hkʼaˬ htaˆ kaꞈ bon lawˬ sheˍ. Awˬ lawn kʼo, awˬ pa awˬ e teˇ gʼaˇ le le daꞈ ve awˬ ceuˬ yaˇ htaꞈ piˇ gaˇ ve yoˬ. Yaˇ hkaoˍ monˇ lawˬ ve kʼo, haˉ pui shiˍ piˇ tuˬ laˇ? Yawˇ ngaˇ lawˬ ve kʼo, vuiˬ yuˬ piˇ tuˬ laˇ?’

Yeˍsuˆ awˬ lawn hkʼa peu˗eˬ htaꞈ kʼoˆ maˍ piˇ ve, ‘nawˬ ve yaˇ htaꞈ daꞈ ve mawˇ piˇ hkawˇ shiˍ ve kʼo, mvuhˇ naw ma hkʼoˆ chehˇ ve nawˬ ve Awˬ pa Yaˬhoˉvaˬ kaꞈ nawˬ htaꞈ daꞈ ve kehˬ ve awˬ ha hpu peꞈ laˇ tuˬ yoˬ. Yaꞈ hkʼaˇ, nawˬ hkʼaˬ htaˆ kaꞈ gʼa lawˬ ve yoˬ.’ Yeˍsuˆ beˆ maˍ laˇ ve htaꞈ nawˬ gʼaꞈ te chehˇ˗aw laˇ? Nawˬ aˬ htoꞈ ma ve awˬ lawn bon lawˬ jaw ve le?