Bafalisi nebaezanga lika kaufela kuli batabise batu. Haiba baeza nto yeñwi ka sishemo, neli ka mulelo wa kuli batu bababone. Nebalapelelanga mwa libaka mone kubanga hahulu batu ilikuli mañi ni mañi ababone. Bafalisi nebapetanga litapelo zetelele ni kulikuta-kutela mwa masinagoge ni mwa makona a makululu ili fone bakona kuutwiwa ki batu. Kacwalo, batu nebakomokile Jesu haana babulelezi kuli: ‘Musike mwalapela sina Bafalisi. Banahana kuli Mulimu ukatabiswa ki manzwi abona amañata, kono hakicwalo. Tapelo ki ya mwahalaa mina ni Jehova. Musike mwabulelanga litaba zeswana ka kukuta-kutela. Jehova ubata kuli mumutaluseze luli momuikutwela.

‘Muswanela kulapelanga cwana: “Ndataa luna ya kwa mahalimu, libizo lahao likeniswe. Mubuso wahao utahe. Tato yahao iezwe fa lifasi,  sina moiezezwa kwa lihalimu.”’ Hape Jesu naababulelezi kuli baswanela kulapelela ka za sico sa lizazi leo, za kuli libi zabona liswalelwe, ni litaba za ka butu.

Jesu naabulezi kuli: ‘Musike mwatuhela kulapela. Muzwelepili kukupa Ndataa mina, yena Jehova, kuli amife lika zende. Mushemi kaufela ubata kufa mwanaa hae lika zende. Haiba mwanaa mina amikupa sinkwa, kana muka mufa licwe? Haiba akupa tapi, kana muka mufa noha?’

Cwale Jesu ababulelela zanaatalusa, ali: ‘Haiba mina muziba kufa limpo zende kwa bana bamina, Ndataa mina, yena Jehova uka mifa hahulu moya okenile! Zemutokwa feela kueza ki kukupa.’ Kana mwalatelela kelezo ya Jesu? Ki lika mañi zemukupanga hamulapela?