Bafadiseo bādi balonga kintu kyo-kyonso mwanda wa kutulumuja bantu. Shi abalonga kintu kiyampe, bādi basaka bantu bebamone. Bādi balombela mu bifuko mudi bantu bavule mwanda wa bantu bebamone. Bafadiseo bādi bakwatyile milombelo milampe pa mutwe ne kwiipitulukapituluka mu mashinankonka ne mu mansanka a mashinda mwine mwādi mubwanya bantu kwibevwana. O mwanda bantu bātulumukile pēbasapwidile Yesu amba: ‘Kemwakilombelai pamo bwa Bafadiseo. Balañanga’mba basa kutulumuna Leza na kulombela milombelo milamila, inoko kuno i kwiongola. Milombelo i mīsambo yobe na Yehova. Kokinena bintu bimo wadi’mo kodi’mo. Yehova usakanga umulombole byodi nabyo ku mutyima.

 ‘Mufwaninwe kulombela namino: “Tata wetu udi mūlu, dijina dyobe dipandulwe. Bulopwe bobe bwiye. Kiswa-mutyima kyobe kilongeke, pamo na momwa mūlu, ne pano pa ntanda pene.”’ Kadi Yesu wēbalombwele’mba bafwaninwe ne kulombela pa mwanda wa byakudya byabo bya pa difuku, pa mwanda wa kulekelwa bubi bwabo, ne pa myanda yabo mikwabo.

Yesu wānenene amba: ‘Kemwakilekai’byo kulombela. Lombai’nka kulomba bintu biyampe kudi Shenu Yehova. Mbutwile ye-yense usakanga kupa wandi mwana bintu biyampe. Shi obe mwana wakulombe mukate, le ukokeja kumupa dibwe? Shi wakulombe mwita wa lui, le ukamupa nyoka?’

Kupwa, Yesu wālupula’mo bufundiji bwa amba: ‘Shi banwe muyukile kupa benu bana bintu biyampe, Yehova, Tata wenu ke pepi, abulwepo kwimupa mushipiditu wandi ujila? Banwe kyenu i kulomba.’ Lelo ulondanga madingi a Yesu? Le i bintu’ka byolombelanga mu milombelo yobe?