Vafwaliseu valingilenga vyuma mangana vavamone kuvatu. Nge vanasolwela mutu likoji, vasakilenga vatu vavavulu vatachikize chuma vanalingi. Valombelelenga kuvihela vyasanga mangana vatu vosena vavamone. VaFwaliseu valaminyinyinenga mazu akulomba mumutwe nakuhilukila hilukila mazu wowamwe mukulomba chavo mujisunangonga namujijila mangana vavevwe kuvatu. Ngocho, vatu valikomokelele chikuma omu Yesu avanangwile ngwenyi: ‘Kanda kulomba ngana muze veji kulombanga vaFwaliseuko. Mwomwo vakiko veji kushinganyekanga ngwavo kuzachisa mazu amavulu mukulomba chavo nachivwisa Kalunga kuwaha, oloze omu keshi mukikoko. Kulomba chapwa kuhanjika naYehova. Kanda kuhilukilanga mazu wowamwe mukulomba chenuko. Yehova asaka umulwezenga vyuma vyosena vili mumuchima wove.

 ‘Mwatela kulombanga ngwenu: “Ove Setu uli mwilu, lijina lyove lipwenga lyajila. Wangana wove wizenga. Mwaya muchima wove mulingiwe mwilu, nahamavu nawa.”’ Yesu avalwezele nawa ngwenyi, vatela kulombanga vyakulya vyahakumbi hakumbi, nakulomba mangana vavakonekele jishili javo, navyuma vyeka vyasakiwa mukuyoya.

Kufumaho, Yesu ambile ngwenyi: ‘Kamwatela kulitwamina kulombako. Twalenuho lika kulombanga Senu Yehova amihane vyuma vyamwaza. Chisemi hichisemi eji kuhananga mwanenyi vyuma vyamwaza. Kachi nge mwanenu mwamilomba mbolo, kutala namumuhana lilolwa tahi? Kachi nge mwamilomba ishi kutala namumuhana linoka tahi?’

Jino Yesu avalumbunwinyine chishina chachilemu ngwenyi: ‘Kachi nge enu mwatachikiza mwakuhanyina mawana amwaza kuli vana venu, nyi ngachilihi Senu wamwilu Yehova uze nahase kumihana shipilitu yajila? Enu mwatela kaha kulombanga.’ Uno weji kukavangizanga kunangula chaYesu tahi? Vyuma muka weji kulombanga kuli Kalunga?