In bʼanttoq nimku tiʼchaq kyuʼn fariseo noq tuʼn kyjaw labʼin txqantl kyiʼj. Qa in bʼanttoq jun bʼaʼn kyuʼn, in kubʼtoq kybʼinchaʼn noq tuʼn tok kykeʼyin txqantl. Jun techel, in che naʼntoq Dios kyoj tembʼil jatumel ateʼ nim xjal tuʼntzun tok kyqʼoʼn kywitz kykyaqil xjal kyiʼj. In che kyajtoq junjun naʼj Dios toj kywiʼ aʼyeju nimtoq kyqan, ex in xitoq kyqʼamaʼn jun ex juntl maj ax naʼj Dios jlu kyoj ja te kʼulbʼil ex kyoj bʼe noq tuʼn kyok bʼiʼn kyuʼn xjal. Tuʼntzunju, etz kywitz xjal tiʼj tej t-xi tqʼamaʼn Jesús jlu kye: «Miʼn che naʼne Dios ik tzeʼn kye fariseo. In kubʼtoq kyximen qa tbʼanel jaku tzʼela toj twitz Dios aj tajbʼen nim yol kyuʼn, noqtzun tuʼnj, nya ax tok jlu. Aju naʼj Dios jun tten tuʼn tyolina tjunalxa tukʼil Jehová. Miʼn txi tqʼamaʼna ax yolju. Tajbʼil Jehová tuʼn t-xi tqʼamaʼna te aju axix tok in tnaʼna».

Kukx xi tchikʼbʼaʼn Jesús alkye tten tuʼn qnaʼn Dios: «Qman Dios ata toj  kyaʼj, tzʼokwit tbʼiya te xjan. Ku ttzajju Tkawbʼila. Bʼant-xwitju tajbʼila, ik tzeʼn toj kyaʼj, ax ikx twitz Txʼotxʼ». Yajxitl, xi tqʼamaʼn Jesús kye tuʼn t-xi kyqanin kywa te junjun qʼij toj kynaʼj Dios, ex tuʼn t-xi kyqanin najsama tuʼn tkubʼ najsaʼn kyil ex tiʼj junjuntl tiʼchaq at toklen toj kyanqʼibʼil.

Ax ikx tqʼama Jesús jlu: «Miʼn kyaj ttzaqpiʼna tuʼn tnaʼna Dios. Kukx qaninxa qe tbʼanel tiʼchaq te Tmana, Jehová. Kykyaqil qe tatbʼaj kyaj tuʼn t-xi kyqʼoʼn tbʼanel tiʼchaq kye kykʼwaʼl. Qa ma tzaj tqanin tkʼwaʼla jun twa, ¿jakupe txi tqʼoʼna jun abʼj te? Ex qa ma tzaj tqanin jun pescad, ¿jakupe txi tqʼoʼna jun kan, moqa jun lobʼaj te?».

Xitzun tchikʼbʼaʼntl Jesús alkye xnaqʼtzbʼil jaku tzʼel qiʼn tiʼjju otoq bʼaj tqʼamaʼn: «Qa in xi tqʼoʼna tbʼanel oyaj kye tkʼwaʼla, ¡nyapetzulo mas ktzajel tqʼoʼn Tmana, Jehová, xewbʼaj xjan teya! Aju kbʼantel tuʼna oʼkx tuʼn t-xi tqanina te». ¿In kubʼpe tbʼinchaʼna aju tqʼama Jesús? ¿Tiʼ teya in xi tqanin te Jehová aj tok tene naʼl Dios?