Vyonsi vino Afaliseo yacitanga yavicitanga pakuti yazanzye antu. Ndi cakuti yacita ivisuma, yavicitanga pakuti antu yayalole. Nupya yapepelanga uku ncende ukuli antu pakuti sile yayalole. Afaliseo yapepanga mapepo atali nupya aakusungila alino nu kuswilizyapo ivili vimwi mu masunagogi nu mu miseo pakuti antu yauvwa kuli aliyo. Fwandi antu yazungwike lino Yesu wayaneenyile ati: ‘Mutakolanya Afaliseo lino mu kupepa. Yakaelenganya ukuti yangazanzya Leza nga yavuzya amazwi, nomba asizangila umu mapepo yayo. Nga mu kupepa ala mu kulanzyanya na Yeova. Fwandi mutaswilizyapo ivili vimwi. Yeova akalonda mwamuneena ivili mu mwenzo.

 ‘Mulinzile ukupepa vii: “Tata witu uwa kwi yulu, leka izina lyako licindikwe. Uwene wako wize. Kulonda kwako kucitike pano nsi wakwe vino kukucitika nu kwi yulu.”’ Nupya Yesu wayaneenyile nu kulapepa ukuti Leza ayapele ivyakulya vyako cila wanda, ukwelelwa imembu, na pali vyuze ivya palwao.

Yesu wayaneenyile nu kuti: ‘Mwapepa lyonsi. Twalililini ukulenga ivintu visuma kuli Tata winu, Yeova. Umuvyazi wensi akalonda ukupeela umwana wakwe ivisuma. Uzye ndi cakuti umwana winu wamulenga umukate, mungamupeela iwe? Nanti nga wamulenga inswi, uzye mungamupeela inzoka?’

Lyene walondolwile vino yangasambililako lino watiile: ‘Ndi cakuti mwamanya ivya kupeela ana inu ivintu visuma, uzye Tata winu Yeova, atalacizyapo ukumupeela umupasi wa muzilo? Cino mulinzile ukucita sile, u kumulenga.’ Uzye ukacita vino Yesu walanzile? I vyani vino ukapepelapo?