Fariseos nochipa kitemouayaj maj taltikpakneminij kinmoujkaitanij. Komo kichiuayaj teisa tein kuali, kitemouayaj maj kinueyitalianij. Kemej neskayot, kitataujtiayaj Dios kampa miakej panouayaj porin kinekiaj maj nochin kinitanij. Momamachtiayaj uejueyi netataujtilmej uan kijtouayaj itech inintiopan judíos uan itech ojmej porin kinekiaj maj kinkakinij. Yejua ika taltikpakneminij kimoujkakakkej Jesús keman kijtoj: “Amo xikchiua netataujtil kemej fariseos. Yejuan kinemiliaj ke Dios kinmoujkakakis komo kikuij miak tajtolmej, sayoj ke nejon amo melauak. Netataujtil kijtosneki ke sayoj tejua titajtoua iuan Jiova. Amo nochipa xikijto sayoj se taman. Jiova kineki xikilui keniuj yekmelauj timomachilia”.

Jesús kisentokak kijtoj keniuj kichiuaskej netataujtil: “ToTajtsin akin tiyetok iluikak, maj moueyitali motokay. Maj uiki moTekiuajyo.  Maj mochiua motanejnekilis, kemej iluikak, no ijkon nikan taltikpak”. Ompa kiniluij ke monekia kitajtaniskej Dios tein kikuaskej mojmostaj, maj kintapojpolui inintajtakoluan, uan okseki taman tein kinpoloskia.

Uan no, Jesús kijtoj: “Nochipa xikchiua netataujtil. Xiksentoka xiktajtani tein kuali moTajtsin, Jiova. Nochin tetatmej kinekij kinmakaskej ininkoneuan tein kuali. Komo mokonetsin mitstajtania se pantsin, ¿tikmakas se tet? Uan komo mitstajtania se amichij, ¿tikmakas se kouat?”.

Ompa Jesús kiniluij toni kijtosnekia: “Komo tikinmaka mokoneuan tein kuali, ¡okachiok moTajtsin, Jiova, mitsmakas yektikatsin espíritu! Sayoj moneki tiktajtanis”. ¿Tikchiua tein kijtoj Jesús? ¿Toni tiktajtania Jiova keman tikchiua netataujtil?