Ova Faliseu ankho vehole okulilekesa kovanthu. Tyina valinga tyimwe otyiwa, ankho opala vala okulilekesa kovanthu. Ankho vetyihole okulingila omalikuambelo pana pena ovanthu ovanyingi opo vamonwe. Ova Faliseu ankho vakoneka ine vapaka momutwe omalikuambelo nokuewana-wana tyina vekahi mondyuo yokufendela no po nonthele mbomatapalo opo vatehelelwe novanthu. Ovanthu avahuvu unene etyi Jesus evepopila okuti: ‘Muhelikuambelei ngo va Faliseu. Vasoka okuti Huku mapande omalikuambelo avo awanua-wanua. Elikuambelo opala vala ove, na Jeova. Tyina ulikuambela uhawane-wane vala otyipuka tyike. Jeova uhanda ove umupopile atyiho tyikahi momutima wove.

 ‘Muna okulikuambela okuti: “Tate yetu keulu, enyina liove lisukukiswe. Ouhamba wove uye. Ehando liove lilingwe pano pohi, ngetyi lilingwa keulu.”’Jesus tupu evepopila okuti vena okulikuambela okuita etyi mavali kese nthiki, nokuita opo ononkhali mbavo mbuevelwe, novipuka ovikuavo vesukisa.

Jesus wati: ‘Muhayekeipo nalumwe okulikuambela. Tualeiko okuita ku Tate yenyi, Jeova, ovipuka oviwa. Ovohe aveho vahanda okuavela ovana vavo ovipuka oviwa. Inkha omona wove ukuita ombolo, okuti, ove upondola okumuavela emanya? Inkha ukuita ombisi, okuti ove umuavela onyoka?’

Konyima Jesus ahangununa okuti: ‘Inkha onwe mutyivila okuavela ovana venyi ovipuka oviwa, okuti Tate yenyi, Jeova, kamemuavela vali unene ospilitu sandu? Atyiho muesukisa itei vala.’ Okuti ove ukahi nokulandula etyi Jesus alongesa? Ovipuka patyi ove wiita tyina ulikuambela?