Soahng koaros me Parisi ko kin wia kin mehnte pwe aramas akan en kin kapinga irail. Ma re kin wia mehkot me mwomwen kadek, re kin wia met pwe aramas ako en kak tehk. Irail kin kapakap nan wasa me aramas tohto kin kohla ie pwe ren kak kilang. Parisi ko kin wadlikihala kapakap reirei kan oh kin pwurepwurehng doadoahngki kapakap pwukat nan sinakoke kan oh nanial akan wasa me aramas akan kak rong irail. Eri aramas ako pwuriamweikihla ni Sises eh mahsanihong irail: ‘Kumwail dehr kapakap alasang Parisi ko. Irail kin medewe me Koht pahn kupwurki arail kin doadoahngki lepin lokaia tohto, ahpw e sohte kin kupwurki met. Kapakap kin wiawi nanpwungen kowe oh Siohwa. Kumwail dehr kin kapwukapwurehiong lepin lokaia kan. Siohwa kupwurki ken padahkihong ih dahme uhdahn mi loalomw.

‘Iet mwomwen amwail pahn kin kapakap: “Samat me ketiket nanleng,  mwaromwi en sarawihla. Sapwellimomwi Wehi en ketido. Kupwuromwi en kin wiawi nin sampah duwen eh kin wiawi nanleng.”’ Sises pil mahsanihong irail me re anahne kapakapki kanarail mwengehn ehuehu rahn, mahkpen diparail kan, oh soahng kan me pid duwen pein irail.

Sises mahsanih: ‘Kumwail dehr uhdihsang kapakap. Pousehlahte peki rehn Samamwail, Siohwa, soahng mwahu kan. Pahpa oh nohno koaros kin men kihong neirail seri kan mehkot mwahu. Ma noumw pwutak peki rehmw pilawa, ke pahn kihong ih takai? Ma e peki rehmw mwahmw, ke pahn kihong ih sineik?’

Sises eri ketin kawehwehda iren mehn kasukuhlo: ‘Ma ke ese mwomwen omw pahn kihong noumw seri kan kisakis mwahu kan, eri Semomw Siohwa, soh pahn ketikihong uhk sapwellime manaman? Ihte me ke anahne wia iei en peki.’ Ke kin idawehn sapwellimen Sises kaweido? Soahng dah kan me ke kin kapakapki?