Fariseukunaqa wakinkuna rikäyänanllapaqmi imëkatapis rurayaq. Alläpam alli tukuyaq. Atska rëzukunata yachakïkurmi Diosta adorayänan wayikunachö y cällikunachö unë mañakurnin kakuyaq. Tsëmi nunakunaqa yarpakachäriyarqan Jesus kënö niptin: “Ama fariseukunanöqa mañakuyankitsu. Pëkunaqa pensayan mañakïninkunachö mëtsikata parlar Diosta kushitsiyänampaq kaqtam, peru manam tsënötsu. Mañakuyanqëkitaqa Jehovällam musyanan. Ama kaqllataqa kutin kutin parlayankitsu. Jehoväqa munan imanö sientikuyanqëkita willayänëkitam”.

Tsëpitam Jesusqa kënö mañakuyanki nirqan: “Ciëluchö këkaq Teytalläkuna, jutiki respetashqa katsun. Gobiernïki shamutsun. Ciëluchö y patsachö munëniki rurakätsun”. Nïkurmi tsë junaqchö mikïninkuna  kayäpunampaq, jutsankunapita perdonëkunampaq y mas asuntukunapaqpis Diosta mañakuyänampaq nirqan.

Jinamampis Jesusqa kënömi nirqan: “Ama Diosman mañakïta jaqiyëtsu. Antis imëka allikunata Teytëkikuna Jehoväta mañakur sïguiyë. Llapan teytakunapis imëka allikunatam tsurinkunata qoyan. Tsuriki tantata mañashuptikiqa, ¿rumintsuraq qoykunkiman? O pescäduta mañashuptikiqa, ¿culebrantsuraq qoykunkiman?”.

Tsëpitanam kënö nirqan: “Qamkunapis tsurikikunata alli qarëkunata qoykäyaptikiqa, ¿manatsuraq masraq Teytëkikuna Jehovänäqa santu espïritunta qoyäshunki? Tsëmi pëman mañakuyänëki”. Qamqa, ¿Jesus ninqannöku rurëkanki? ¿Imakunapaqtaq Jehoväman mañakunki?