Fariseo runakunam imatapas ruwaqku runakuna qawanallankupaq. Chaymi lliw runakunapa qayllanpi una-unayta mañakuqku, hinaspapas kuti-kutirispam callekunapi chaynataq huñunakuna wasikunapipas mañakuqku. Jesusmi ichaqa kaynata nirqa: “Amam fariseokuna hinaqa mañakunkichikchu. Paykunaqa piensankum llumpayta rimasqankurayku Diospa uyarisqan kasqankuta, ichaqa manam Jehova Diosqa uyarinchu. Qamkunaqa sapallaykichikpim Dioswan rimanaykichik. Amataqyá kuti-kutirispaqa hina kaqllataqa rimaychikchu, Jehova Diosqa munan sunqumanta mañakunaykichiktam”, nispa.

Jesusqa nirqaraqmi: “Kaynatam mañakunaykichik: ‘Hanaq pachapi taytayku sutiki chuyanchasqa kachun. Munaychakuynikiyá hamuchun. Munasqaykiyá ruwasqa kachun kay pachapipas hanaq pachapi  hina’”, nispa. Yachachirqataqmi mikuyta mañakunankupaq, huchankumanta pampachasqa kanankupaq chaynataq allinlla kanankupaqpas.

Jesusqa nirqataqmi: “Hinallam Jehova Dios taytaykichikta mañakunkichik. Lliw tayta-mamakunam churi-wawankuman allin kaqta qunku. Warmanku tantata mañakuptinqa, ¿quykunmankuchu rumita? Challwa kankata mañakuptinpas, ¿quykunmankuchu culebrata?”, nispa.

Chaywanqa yachachichkarqam taytanchik Jehova Diosta mañakuptinchik chuya espiritunta quwananchikmanta. Chaymi sapa kuti chuya espiritunta mañakunanchik.