Fariseocuna imatapash rurashpaca shujcuna ricuchunllami ruran carca. Alita rurashpapash shujcuna alicachichunllami shina ruran carca. Paicunaca, gentecuna ricuchunllami tandanajuna huasicunapi, ñangunapi shayarishpa chaitallata cutin cutin mañan carca. Chaimandami gentecunaca Jesús ima nijta uyashpaca manllarinajurca. Fariseocuna shinaca na mañanachu canguichi. Paicunaca Dios uyanga yashpami chaitallata chaitallata mañajun. Shinapash paicunataca Diosca na uyanllu. Ashtahuanbash Jehová Diosta mañajushpaca paihuan parlajunshnami cana can. Paita mañajushpaca chaitallata chaitallataca na nijunachu cangui. Jehová Diosca quiquinguna imashinapacha sintirishcata paiman villachunmi munan.

Jesusca Diosta imashina mañanata ashtahuan yachachishpami cashna nirca: ‘Jahua pachapi tiajuj ñucanchi Taitalla, canba jucha illaj shutiguca alicachi tucushca cachun. Can mandanaca ucha chayamuchun. Imashnami jahua pachapica can munashcashna ruranajun, chashnallata cai pachapipash can munashcashna ruranajushpami ali canman’ nishpa. Jipamanga cada punllapa  micunamanda mañachun, ñucanchi juchacunata perdonachun, shuj cosascunamandapash mañachunmi Jesusca yachachirca.

Ashtahuanbash Jesusca cashnami nirca: Canba Taita Jehová Diostaca tucuita mañashpa catingui. Paita mañanataca na saquinachu cangui. Taitamamacunaca paicunapa huahuacunamanga alita carangapami munan. Cangunapa huahuacuna shuj tandaguta mañajpica ¿rumitacha caranguichiman? Na cashpaca, pescadota carahuai nijpica ¿culebratacha caranguichiman?

Jesús yachachishcamandaca ¿imatata yachajunchi? Jesusca nircami: ‘Cangunapa huahuacuna mañajpica, imatapash aligutami caranata yachanguichi. Jahua pachapi cangunapa Taitacarin paipa espirituta mañajpica, ¿nachu caranman?’ Shinaca Diostallami mañana canguichi. ¿Jesús yachachishca shinachu mañajungui? Jehová Diosta mañajushpaca ¿imatata mañangui?