Farisootu baalanka coye assitannohu mannaho leellamate yiteeti. Insa dancha coye assitannohu mannu afara yiteeti. Insa laˈnansara yite lowo manni noowa huuccatto assidhanno. Farisootu mannu macciishshansara xaadu minenna dooggate qaccera uurrite yitinota yitanni seeda huuccatto assidhanno. Konni daafira Yesuusi, ‘Huuccidhinanni woyite Farisootu gede ikkitinoonte’ yiita mannu dhagge assiˈrino. Insa lowore coyidhino daafira calla Maganu macciishshannoha lawannonsa; kayinni isi togoo huuccatto dimacciishshanno. Huuccatto Yihowanna ati hasaabbinanni hasaawaati. Huucciˈratto woyite yoottota calla yitooti. Yihowa giddokki hedo kulattosira hasiˈranno.

 ‘Togo yitine huuccidhe: “Iima heeˈratto Annanke, suˈmikki qullaawa ikko. Mangistekki daggo. Fajjokki iima ikkitinonte gede uullate aanano ikkito.”’ Qoleno Yesuusi ‘Barru sagale aannoˈne gede, cubboˈne gatona yaannoˈne gedenna wolere hasiisannoˈnere aannoˈne gede Magano huuccidhe’ yee rosiisino.

Yesuusi togo yiino: ‘Huucciˈra agurtinoonte. Annaˈne Yihowa danchare aannoˈne gede huuccidhe. Annunna ama qaaqqinsara danchare aa baxanno. Kiˈne qaaqqiˈne tima huucciˈriro kincho uyitinannini? Qulxuˈme huucciˈreenna hamashsho uyitinannini?’

Hakkiinni Yesuusi rosiisino roso togo yee xawisino: ‘Kiˈne oosoˈnera danchare aa egentinina, Anniˈne Yihowa roorenka qullaawa ayyaana hiitto aa hooganno?’ Ati Yesuusi yiino garinni huucciˈratto? Ati maricho afiˈrate huucciˈratto?