Nizesizesita amin’olo avao ty raha nataoni-Fariseo reo. Nanao kisary soa fanahy rozy soa ho hitan’olo. Nivavaky anivon’olo maro eny koa rozy soa hahita an-drozy ty olo iaby. Nanao tsianjery vavaky lava biby Fariseo reo. Lafa amy synagoga ao amy zay rozy na mbantsisin-dala mbeny, le nampolimpolin-drozy raha rey soa ho ren’olo. Tseriky amy zay olo rey lafa nivola amin-drozy Jesosy hoe: ‘Ka manao manahaky ani- Fariseo reo nareo lafa mivavaky. Ataon-drozy ho falifaly amin-drozy Ndranahary lafa manao vavaky lava biby rozy, kanefa tsy zay. Fa lafa mivavaky nareo, le tokony ho nareo amy Jehovah avao ro mahay azy. Ka mampimpoly raha mitovy avao zisiky farany. Teani-Jehovah ho hay ty tena tsapanao anatinao any.

 ‘Mivavaha manahaky ani-zao: “Babanay an-danitsy any, hohamasi- ny lahy ty anaranao. Ho avy lahy ty Fanjakànao. Hatao an-tany etoy lahy ty sitraponao, manahaky ty an-danitsy any.”’ Nivola amin-drozy Jesosy fa azon-drozy atao ty mivavaky mba hahazo hany amy andro iny noho hengà hadisoa. Afaky mivavaky mikasiky ty raha manahira an-drozy koa rozy.

Nivola Jesosy hoe: ‘Ka mieny mivavaky. Angataho amy Jehovah Babanareo avao ze raha soa. Tea manome raha soa ho ani-anakiny ty baba. Manao akory zao laha mangataky mofo aminao ty anakinao? Hameanao vato? Ka laha mangataky fia? Hameanao bibilava?’

Zao hoasani-Jesosy ty dikani-zay: ‘Ndre nareo aza mahay manome raha soa ho ani-anakinareo, ka vo handraky Jehovah Babanareo? Hameany fanahy masy nareo laha vo mangataky aminy.’ Manao raha nivolanini-Jesosy zay va iha? Ino iaby ty raha resahinao lafa mivavaky iha?