BaFarisi bebenta tintfo kuze babukise. Nangabe benta lokuhle bebafuna bonkhe bantfu bakubone. Bebathantaza emigwacweni lemikhulu kute babonwe bantfu. BaFarisi bebayibamba ngenhloko imithantazo lemidze bese bayisho emasinagogeni nasetitaladini lapho bebatawubonwa khona bantfu. Ngako bantfu bamangala ngesikhatsi Jesu atsi: ‘Ningathantazi njengebaFarisi. Bacabanga kutsi Nkulunkulu utayilalela lemithantazo yabo lemidze, kodvwa akayilaleli. Umthantazo kufanele ube semkhatsini wakho naJehova. Ningaphindzaphindzi intfo yinye. Jehova ufuna umtjele indlela lotiva ngayo.’

‘Kufanele nithantaze ngalendlela: “Babe wetfu losezulwini, alingcweliswe libito lakho. UMbuso wakho awute. Intsandvo yakho  ayentiwe emhlabeni njengasezulwini.”’ Jesu waphindze watsi nabathantaza babocela kudla kwangalelo langa, bacele kucolelwa tono tabo, futsi bacele nako konkhe labakudzingako.

Jesu watsi: ‘Ningakuyekeli kuthantaza. Chubekani nicela tintfo letinhle kubabe wenu Jehova. Wonkhe umtali uyafuna kupha umntfwana wakhe tipho letinhle. Nangabe umntfwana wakho akucela sinkhwa, ungamnika yini litje? Nangabe akucela imfishi, ungamnika yini inyoka?’

Jesu wabese utsi: ‘Nangabe nikwati kunika bantfwabenu tipho letinhle, kakhulu kangakanani-ke ngaBabe losezulwini lobapha umoya longcwele labo labamcelako. Ngako kudzingeka nicele.’ Uyakwenta yini loku Jesu lakushoko? Ngutiphi tintfo loticelako nawuthantaza?