Tau Farisi mapulu taumata wal᷊inẹ mẹ̌dalo si sire. I sire měkoạ barang mapia tadeạu kasilong taumata wal᷊inẹ. I sire mědẹ̌doa su tampạ piạ lawọ taumata tadeạu pandaěng. Tau Farisi mělẹ̌hafalẹ̌ daroa manandụ kụ měpẹ̌pakẹ daroa ene su tampạu pěngangibadang dingangu su pondol᷊u ral᷊eng tadeạu karingihangu taumata. Hakị u ene, taumata lawọ himěkosẹ̌ su tempong Yesus nẹ̌bera, ’Abe pẹ̌doa kere tau Farisi. I sire nẹ̌pikirẹ̌ Mawu mal᷊uasẹ̌ su manga bawerang i sire, katewe sěběnarẹ̌e tala. Mẹ̌doa ene kai mẹ̌bisara si Yehuwa, bal᷊inẹbe gunang pandaěngu taumata. Abe turusẹ̌ měpakẹ bawera mẹ̌sul᷊ung. Yehuwa mapulu i kamene maul᷊ị lohongu naung i kamene.

’Pẹ̌doạe kere ini, ”I Amang kami su sorga, apakasusiko areng’U. Karěntako Kararatuang’U. Apakasěhụko kapulu-Nu su dunia kere  su sorga.”’ Yesus lai nẹ̌bera i sire botonge mẹ̌doa mẹ̌dorong kaěng gunang ěllo ene, mẹ̌dorong tadeạu dosang i sire ampungang, dingangu mẹ̌dorong soal u manga hal᷊ẹ̌ bal᷊inẹ.

Yesus nẹ̌bera, ’Turusẹ̌e pẹ̌doa. Turusẹ̌e pẹ̌dorong barang mapia si Amang i kamene, i Yehuwa. Matimadẹ̌ tantu mapulu měgělị barang mapia su anạe. Mạeng anạ i kamene mẹ̌dorong borotẹ̌, apa i kamene sarung měgělị batu? Mạeng i sie mẹ̌dorong kinạ, apa i kamene sarung měgělị těmpu?’

Bọu ene i Yesus nělahẹ, ’Mạeng i kamene masingkạ cara měgělị hadiah mapaelẹ̌ su anạ i kamene, limembong lai i Yehuwa, i Amang i kamene. I Sie sarung měgělị rohkẹ̌ masusi si kamene. I kamene kate pẹ̌dorong.’ Apa i kau timuhụ su bawerang i Yesus? Manga hal᷊ẹ̌ apa niul᷊ịu su ral᷊ungu daroanu?