Xúgíʼ rí nini fariseos ninindxu̱u̱ mu xa̱bu̱ maguanún tsiánguá. Á mu nuni mbá rí májánʼ, nuni mu xa̱bu̱ mbuñún. Mbá xkri̱da, nutajkháan náa rí kuwa mbaʼin xa̱bu̱ mú xúgínʼ ma̱ndoo mbuñún. Nagi̱da̱ʼ edxu̱ún tsajkhun rí nindxu̱u̱ mba̱a̱ wéñuʼ ga̱jma̱a̱ nuthi rúʼko̱ náa sinagogas ga̱jma̱a̱ náa calles mu eʼwíínʼ xa̱bu̱ mudxuun. Ikha jngó xa̱bu̱ niʼniún tsiánguá índo̱ Jesús niʼthí: “Xáratajkáan xóo eni fariseos. Ikhiin nakumu̱ún rí maniguuʼ Dios á mu najmún mbaʼa ajngáa, mú ragájkhun rígi̱. Tsajkhun nindxu̱u̱ rí maratamíjná ikháánʼ ga̱jma̱ʼ Jeobá. Xárata kikháá. Jeobá nandoo maratha̱a̱n xú káʼnii phú ku̱ma̱ʼ”.

Jesús niʼthí xú káʼnii gutajkáan: “Anu̱xu bi̱ xtaa mekhuíí, gaguma kaʼwi̱i̱ mbiʼyaaʼ. Ga̱ʼkha̱ Reino ndrígáʼ. Gambanúu xóo rí nandaʼ ikháánʼ, xó má rí nambánuu mekhuíí, xúʼko̱ má gámbanuu náa ku̱ba̱ʼ ma̱ngaa”.  Nda̱wa̱á Jesús niʼthún rí gíʼmaa mutajkáan mu munda̱ʼa̱ ganitsu rí mu̱phu̱ mámbá mbiʼi ga̱jma̱a̱ munda̱ʼa̱ rí maguma mba̱a̱ a̱jkiu̱ún kuñún, ga̱jma̱a̱ i̱ʼwáʼ rí nda̱ñúnʼ.

Ma̱ngaa Jesús niʼthún: “Xátatsiʼñáʼ raratájkáan. Atanda̱ʼa̱a̱ rí májánʼ Ana̱ʼ Jeobá. Xúgínʼ xa̱bu̱ bi̱ guáʼdiin e̱ji̱n nandún muxnún rí májánʼ e̱jñún. Á mu a̱ʼdiáaʼ na̱nda̱ʼa̱ʼ pan, lá maraxna̱a̱ mbóo itsí xáʼ. Ga̱jma̱a̱ á mu na̱nda̱ʼa̱ʼ mbáa e̱gi̱ʼ, lá maraxna̱a̱ mbáa a̱bu̱nʼ xáʼ.”

Ikhú Jesús niʼthún ndiéjunʼ gándoo gajmañulú ga̱jma̱a̱ numuu rí niguámbóo niʼthún: “Á mu najmañaʼ maraxnu̱u̱n regalo rí májánʼ e̱jña̱ʼ, ¡iwáá Ana̱ʼ, Jeobá, maxnáʼ xi̱ʼ kaʼwu ndrígóo! I̱ndó gíʼmaa matanda̱ʼa̱”. Lá natani rí niʼthí Jesús ráʼ. Ndiéjunʼ tanda̱ʼa̱a̱ Jeobá ikháánʼ índo̱ naratájkáan rá.