Natao o Fariseò ho trea o ndaty ze kila raha soa natao iareo, amy izay iareo tsiririegne. Naho fa nivavake iareo, le nandeha tamy ty toeragne maro ndaty. Nanao vavake lava iareo sady nanao tsianjere. Nagnerekeregne vavake amy ty toeragne ahareza o ndatio aze iareo, ndra tamy ty synagoga agne, ndra tan-dalagney. Gaga o ndatio naho fa nirehake ty Jesosy tie: ‘Ko manahake o Fariseò naho fa mivavake. Tsy hijanjigne ty Jehovah ndra tie maro rehake iareo. I Jehovah raike avao ty toko’e haharey ty vavake atao’o. Ko manao tsianjere naho fa mivavake, fa ze am-po’o ao ro rehafo ama’e.

Mivavaha hoe izao: “Rae’ay amy i lagnitsey ao, homasinegne abey ty tahina’o. Ho avy abey i fanjakà’oy! Hanoegne an-tane etoy abey  ze zoton’arofo’o hambagne amy ty an-dagnitse agne!”’ Nirehake tamy iareo ty Jesosy fa afake mivavake hoahy ty hane iareo isan’andro iareo, mangatake famelan-keloke naho mirehake ze raha manahiragne.

Hoe ty Jesosy: ‘Mivavaha lognandro. Mangataha raha soa amy i Jehovah Rae’areo. Fa ndra o rae aman-dreneo ka te hagnomey raha soa hoahy ty ana’e. Homea’o vato vao ty ana’o naho mofo ty angatahe’e? Homea’o meregne vao reke naho mipay fiagne?’

Nagnazava amy izay ty Jesosy tie: ‘I rehe aza magnomey raha soa ty ana’o, tsy mihoatse izay vao ty Jehovah rae’o? Homea’e i fagnahy masigney rehe.’ Oriho areke ty toroheve i Jesosy naho fa mivavake.