Hanma kwagh cii Mbafarishi yange ve eren ér ior ve nenge i doo ve. Vea eren kwagh u dedoo a or kpa, ve soo ér mbagenev ve nenge. Yange ve eren msen ken igbar ér hanma or nana nenge a ve. Mbafarishi yange ve kôr mbamsen mba lihen ken ityou, ve za kimbir ken ushinagoge kua sha akahar a ugodobi, ape ior vea ungwa er ve lu eren msen yô. Kpa Yesu va tesen ér gba u a eren msen nahan ga yô, kpiligh ior iyol tsung. Yesu kaa a ve ér: ‘De eren nen msen er Mbafarishi nahan ga. Ka ve hen ér vea ôr akaa kpishi nahan i doo Aôndo, kpa ka i doo un ga. Msen ka kwagh u u lu ôron Yehova tseegh yô. Shighe u u lu eren msen yô, de kimbir kwagh môm gbem ga. Yehova soo ér we u ôr un kwagh u a lu u ken ishima la jighilii.

‘Ka akaa a i gbe u ne sônon ken msen je ne: “Ter wase u Sha, i tsegha  iti You, tartor Wou u̱ va, i er ishima You shin tar kpaa vough er i eren i Sha nahan.” ’ Yesu shi kaa ér vea eren msen yô, ve sôn Aôndo a na ve kwaghyan ken iyange i ve lu ker la, shi ve zamber a na a de ve asorabo a ve, shi ve eren msen sha akaa a ve agen kpaa.

Yesu kaa ér: ‘Mayange de deen nen u eren msen ga. Sônon nen Ter wen, Yehova, akaa a injaa gbem. Hanma ormaren cii ka nan soo u nan wan u nan akaa a injaa. Aluer wan wou sôn u bredi nahan, u na un iwene? Aluer a kaa ér we u na un anishu yô, u gema u na un iyô shinii?’

Yesu maa shi pase ve kwagh u vea hen ken kwagh ne yô, a kaa ér: ‘Aluer ne kpa ne fa u nan ônov enev uiyua mba dedoo yô, Ter wen, Yehova una hemba fan u nan ne icighan jijingi, u a lu iyua i hemban cii la ga he? Kwagh u ne er ve a na ne yô, saa ne sôn.’ U ngu dondon kwaghwan u Yesu ne kpa? Ka nyi akaa nahan ka u er msen sha mini?