Kɛnɛ tshɛ kakasalaka Afarisɛ ele dia mambiya anto. Awui w’ɛlɔlɔ wakawasalaka ele paka l’oyango w’anto mbowaɛna. Vɔ wakalɔmbaka lo asɛkɛ, di’anto mbowaɛna. Afarisɛ wakakimɛka alɔmbɛlɔ w’etale l’ɔtɛ ndo wakaakalolɛka mbala la mbala lo toshinangɔnga ndo l’emamu wa mboka lɛnɛ akakoke anto mbowaoka. Ɔnkɔnɛ anto wakaambe etena kakawatɛ Yeso ɔnɛ: Tanyosalake alɔmbɛlɔ wele oko waki Afarisɛ. Vɔ wakɔsaka dia wayambiya Nzambi lo mfudia ɛtɛkɛta, ko tetele aha ngasɔ. Dɔmbɛlɔ ekɔ dui dia lam’asayɛ la Jehowa. Tanyokalolɛke awui akɔ waamɛ mbala la mbala. Jehowa nangaka dia nyu mbotɛ kɛnɛ kele mɛtɛ l’etema anyu.

‘Nyu pombaka nɔmba nyate: “Shɛso lele l’olongo, lokombo layɛ lakidiame. Diolelo diayɛ diaye. Lolango layɛ  latshame la nkɛtɛ oko watshamalɔ l’olongo.”’ Yeso akawatɛ nto dia vɔ pombaka nɔmba dikambo dia mbo ya ndɛ ya lushi la lushi, dia pɛkato yawɔ dimanyiyama ndo dia ehomba awɔ hita.

Yeso akate ate: ‘Tanyotshikake pondjo dia nɔmba. Nyotetemale nɔmba Jehowa Shɛnyu diangɔ di’amɛna. Ombutshi tshɛ nangaka mbisha ɔnande diangɔ di’amɛna. Naka ɔnayɛ kɔlɔmba mapa, onde wɛ ayowosha dive? Naka nde kɔlɔmba lose, onde wɛ ayowosha oloyi?’

Oma laasɔ, Yeso akalembetshiya ɔnɛ: ‘Naka nyu mbeyaka mbisha ana anyu weshasha w’amɛna, Jehowa, Shɛnyu holeka nyosha nyuma k’ekila? Kɛnɛ kahombanyu nsala ele nɔmba.’ Onde wɛ ndjelaka dako diaki Yeso sɔ? Weho akɔna wa diangɔ walɔmbayɛ dikambo diadiɔ?