Yibʼanal ja jas skʼulane ja fariseoʼiki jani bʼa cham aʼiljuke yuja tuki. Yujkʼa ay jas skʼulane bʼa lek, jani bʼa oj kan kʼeljuke. Ti wa xyaweyi orasyon bʼa jaman kʼinal bʼa oj iljuke yuja tuk. Wa snebʼawe najtil orasyonik, sok ja wa xcha yalawe junxta ja bʼa sinagogaʼik sok ja bʼa set bʼejik bʼa oj abʼjuke. Ja yuj ja ixuk winik jel cham yabʼye yajni ja Jesús yala: «Moka wayi orasyon jastal ja fariseoʼik. Ja yeʼnle wa spensarane jel cham oj yabʼ ja Dyos yuja wa xyawe makunuk jitsan yaljelik, pe mi meranuk. Ja orasyon kechanta weʼna soka Jyoba. Moka wal tolabida ja junxta yaljeli. Ja Jyoba wa skʼana oja walyabʼ ja jastal meran aya xa wabʼi».

Ja Jesús xcholo jastal yajelyi orasyon: «JTatikon ti aya bʼa satkʼinal, aʼaxuk sakbʼuk jawa bʼiʼili. Ajakuk jawa Gobyerno. Akʼulaxuk ja jas waxa  kʼana, jastal ja bʼa satkʼinal, cha jachuk ja bʼa luʼum». Cha yala tʼilan oj yaweyi orasyon bʼa skʼanjel ja swaʼele ja bʼa kʼakʼu sok skʼanjel perdon sbʼaja smuleʼi, sok pilan jastik junuk ja bʼa sakʼanile.

Chomajkil, ja Jesús yala: «Mokni awakan yajelyi orasyon. Moka wakanyi skʼanjel jastik lek jawa Tat, Jyoba. Spetsanil ja nantatalik wani skʼanawe yajelyi jastik lek ja yuntikile. Yujkʼa skʼanawi jun pan jawa kerem, ¿oj maʼ wayi jun ton? Sok ta skʼanawi jun chay, ¿oj maʼ wayi jun bʼitsʼbʼichan?».

Tixa xcholo ja Jesús jasa wa xbʼobʼ jnebʼtik sbʼaja jas yala: «Yujkʼa waxa naʼa yajelyi lekil majtanalik jawa wuntikili, ¡jaʼukto maʼ jawa Tat, Jyoba, ojni yawi ja yipi! Ja jas kechan oj akʼuluki jani oja kʼanyi». ¿Wan maʼ xa kʼulan ja jas yala ja Jesús? ¿Jasa waxa kʼanayi ja Jyoba yajni waxa wayi orasyon?