Ebintu byona Abafalisaayo ebi bakoraga bagonzaga kweyoleka. Obu bakonyeraga abantu, bakikoraga habw’okugonza kweyoleka. Basabiraga omu rwijwire nukwo abantu babarole. Abafalisaayo baali bamanyire esaara eziraihire kandi baikaraga nibazigarukamu omu maso’rokaniro, n’omu makuute nukwo abantu basobole kubarora. Abantu bakahunirra Yesu obuyagambire ati: ‘Mutasaba nk’Abafalisaayo abatekereza ngu Ruhanga naija kubahurra habw’okukozesa ebigambo bingi kandi kunu tinukwo kiri. Okusaba kuli hagati yawe na Yahwe. Otagarukamuga ebigambo nibyo bimu buli kaire. Yahwe nagonza omugambire nk’oku orukwehurra omu mutima.

 ‘Gunu nugwo omulingo musemeriire kusaba: ‘Isiitwe ali omu iguru, ibara lyawe lyezebwe. Obukama bwawe bwije. Ebyogonza bikorwe hansi nk’okubabikora omu iguru.’ Yesu akongera yabagambira ati basabege n’eby’okulya byabo ebya buli kiro, basabe nukwo basobole kuganyirwa ebibi byabo hamu n’okusaba ebyetaago byabo ebindi.

Yesu akagamba ati: ‘Mutalijwaha kusaba. Mwikale nimusaba Isiinywe, Yahwe ebintu ebirungi. Buli muzaire agonza kuha omwana we ebintu ebirungi. Omwana wawe kakuba akusaba omugaati n’osobora kumuha ibale? Kandi kakuba akusaba encu, nosobora kumuha enjoka?’

Hanyuma, Yesu akasoborra ekyakaba namanyisa: ‘Obu muraaba mumanyire kuha abaana banyu ebisembo ebirungi, kandi uwe Isiinywe Yahwe, talibaha omwoyo ogurukwera? Mumusabe.’ Ohondera obuhabuzi bwa Yesu? Bintu ki eby’osaba?