КИЧЭЭЛ 82
Иисус канчаар мөргүүрүн өөредип турар
Фарисейлер ажыл-херектерни улуска көөргеттинип кылыр чораан. Олар хөй улус бар черлерге оларны көрзүн дээш мөргүүр турган. Фарисейлер узун мөргүлдерни доктаадып алгаш, кижилер дыңнаар кылдыр синагогаларга, кудумчуларның булуңнарынга оларны катаптап турган. А кажан Иисус улуска: «Фарисейлер ышкаш мөргүвеңер. Олар Бурганның сеткилинге узун мөргүлдер кирер деп бодаар. Херек кырында ындыг эвес. Мөргүл дээрге кижиниң Иегова-биле хууда чугаазы-дыр. Мөргүп тургаш, ол-ла сөстерни катаптаваңар. Иегова силерниң херек кырында чүнү миннип турарыңарны дыңнаксап турар» — дээрге, олар кайгап калган.
Иисус канчаар мөргүүрүн тайылбырлаан: «Дээрде Адавыс, улус сээң адыңны ханы хүндүлеп чорзун. Сээң Чагыргаң черни башкарып,
күзел-сорууң дээрде ышкаш, черге база күүсеттинзин». Оон ыңай ол бачыттарны өршээрин, хууда хереглелдер база бөгүнгү аъш-чем дээш мөргүүрүн чугаалаан.Иисус уламчылаан: «Мөргүүрүн черле соксатпаңар. Иегова Адаңардан дузаны дилээрин уламчылаңар. Ада-иелер ажы-төлүнге чүү эки болурун билир. Оглу хлеб дилээр болза, кым-на аңаа даш бээр деп? Азы балык дилээр болза, кым-на аңаа чылан бээр деп?»
Иисус улаштыр сөстерин тайылбырлап берген: «Силер ажы-төлүңерге эки белектерни берип турар болгай силер, ынчаарга дээрде Адаңар силерге ыдыктыг сүлдезин бербес деп бе?» А сен Иисустуң өөреткени ышкаш кылып турар сен бе? Чүнүң дугайында мөргүп турар сен?
«Дилениңер, Бурган силерге бээр; дилеңер, тып аар силер; эжикти соктаңар, Бурган силерге ажыдып бээр» (Матфей 7:7)