Cosi va Fariseo va enda oku linga, va ci lingaile oco va komõhise omanu. Nda ovo va linga ocina cimue ciwa, va ci lingila oco va muiwe lomanu vakuavo. Ovo va enda oku likutilila povitumãlo viowiñi oco omanu vosi va pondole oku va mola. Va Fariseo va enda oku patekela olohutililo vi lingiwa otembo yalua kuenje va pitulula olohutililo viaco eci va kala volosunangonga kuenda panyaha okuti, omanu va pondola oku va yeva. Omo liaco, omanu va komõha eci Yesu a va sapuila hati: ‘Ko ka likutilili ndeci va Fariseo va lingainga. Ovo va sima okuti va komõhisa Suku lolondaka viavo vialua, pole, Suku ka komõha. Eci o linga ohutililo, ove lika la Yehova. Ko ka tukole ovina vimuamue olonjanja viosi.’ Yehova o yongola okuti ove u sapuila ovina vi kasi vutima wove.

‘Ove o sukila oku likutilila ndoco: “A Isietu o kasi kilu, onduko yove yi sumbiwe. Usoma wove wiye. Ocipango cove ci lingiwe palo posi, ndeci ci lingiwa kilu.”’ Yesu wa va sapuilavo okuti poku likutilila va sukila oku pinga okulia kueteke, oku pinga oco akandu avo a ecelue kuenda ovina vikuavo omunu a sukila.

Yesu wa popia hati: ‘Ko ka liwekipo oku likutilila. Lipiliki oku pinga ovina viwa ku Isiene Yehova. Onjali yosi yi yongola oku eca ovina viwa komõlaye. Nda omõlove wa pinga ombolo anga hẽ u wĩha ewe? Nda eye wa pinga ombisi u wĩha onyõha?’

Noke Yesu wa lombolola olondaka viaco hati: ‘Nda ene vu tẽla oku eca oviali viwa komãla vene, ka ca piãlele enene Isiene Yehova okuti, u wĩhi espiritu sandu? Ene vu sukila lika oku pinga.’ Ove hẽ o kasi oku kapako elungulo lia Yesu? Ovina vipi ove wa siata oku tukula vohutililo?