Isaka iro Fariseo aby io nan̈ano raha, raha baka ho hitanolo fo, amy zen̈y olo midera iro. Nivavaka tamy tany nisy olo maro iro, baka zahanolo. Nan̈ano tsianjery vavaka lava iro nampodipodindro tamy synagoga ndreky tamy sisindalan̈a, baka ho ren̈inolo. Lany fan̈ahy olo, Jesosy koa fa nivolan̈a: ‘Aza man̈ano karaha Fariseo aby io, koa fa mivavaka. Sambarandro mamparavoravo Zan̈ahary baka vavaka lava ataondro io. Iro diso hevitry. Anao ndreky Jehovah fo tokony hahay vavaka ataonao. Ke aza man̈ano vavaka tsianjery. Ravoravo Jehovah izikoa baka amy fô anao mivavaka aminany.’

‘Karaha ty ataova koa fa mivavaka: “Anao Babanay andan̈itry an̈y, irarian̈a an̈aranao ho masin̈y. Irarian̈a ho avy Fanjakan̈anao. Irarian̈a hatao ambony tany eto koa sitraponao, karaha andan̈itry  an̈y.”’ Nirahiny Jesosy koa iro hangataka hanin̈indro isanandra, ndreky han̈ambilan̈a helokondro, baka io hikoran̈a raha hafa manahiran̈a iro.

Jesosy koa nivolan̈a: ‘Aza voly mivavaka amy Jehovah Babantsika, ke mangataha raha tsara aminany. Man̈amia raha tsara zanany aby olobe jiaby. Zanakanaro koa mangataka mofo ma, amianaro vato? Iro koa mangataka laoko, amianaro bibilava?’

Jesosy baka tio nan̈azava: ‘Ndray anaro fo mahay man̈amia raha tsara zanakanaro, ke intsaka eky Jehovah Babanaro! Ten̈a han̈amia fan̈ahy masin̈y anaro izy, fa anaro fo mila mangataka.’ Anao ma man̈ano zen̈y? Ino raha koran̈inao izikoa anao fa mivavaka?