Le fariseoʼoboʼ suuk kaʼach u beetkoʼob yaʼab baʼaloʼob chéen utiaʼal ka ilaʼakoʼob tumen u maasil, jeʼex ken u beetoʼob baʼax uts yéetel ken orarnakoʼob teʼ bejoʼoboʼ. Ku kankoʼob de memoria chowak oracionoʼob yéetel ku babal aʼalikoʼob teʼ sinagogaʼob yéetel teʼ bejoʼob utiaʼal ka uʼuyaʼakoʼoboʼ. Le oʼolal le máakoʼoboʼ jach jaʼakʼ u yóoloʼob le ka tu yaʼalaj Jesús: ‹Maʼ a orareʼex jeʼex u beetik le fariseoʼoboʼ. Letiʼobeʼ ku tuklikoʼob yaan u lúubloʼob utsil tiʼ Dios ikil u sen aʼalikoʼob yaʼab baʼaloʼob, pero leloʼ maʼ jaajiʼ. Orarnen chéen ta juunal tiʼ Jéeoba. Maʼ a sen aʼalik chéen junpʼéeliliʼ baʼal. Jéeobaeʼ u kʼáat ka a waʼaltiʼ jach bix a wuʼuyikaba›.

Jesuseʼ seguernaj u tsolik bix unaj u orar máak: ‹K-Taata yanech teʼ kaʼanoʼ, kiliʼichkúuntaʼak a kʼaabaʼ. Taalak a Reino, beetaʼak baʼax a kʼáat teʼ kaʼanoʼ bey xan way Luʼumeʼ›. Jesuseʼ tu yaʼalaj xan tiʼob  ka orarnakoʼob utiaʼal u kʼáatkoʼob baʼal u jaantoʼob teʼ kʼiinoʼ, utiaʼal ka perdonartaʼak u kʼebanoʼob yéetel tu yoʼolal uláakʼ baʼax kʼaʼabéettiʼob.

Jesuseʼ tu yaʼalaj xan: ‹Maʼ u xuʼulul a orar. Seguernak a kʼáatik tiʼ Jéeoba baʼaloʼob maʼalobtak. Tuláakal taatatsileʼ u kʼáat u tsʼáa baʼaloʼob maʼalobtak tiʼ u paalal. Wa a paal ku kʼáatiktech junpʼéel waajeʼ, ¿jeʼel wa a tsʼáaik junpʼéel tuunich tiʼeʼ? Wa ku kʼáatiktech juntúul kayeʼ, ¿jeʼel wa a tsʼáaik juntúul kaan tiʼeʼ?›.

Jesús túuneʼ tu tsolaj baʼax jeʼel k-kanik tiʼ le baʼax tu yaʼaloʼ: ‹Wa a wojel a tsʼáa baʼaloʼob maʼalobtak tiʼ a paalaleʼ, ¿maʼ wa maas jeʼel u tsʼáaiktech kiliʼich muukʼ Jéeoba, a Taata, yaan teʼ kaʼanoʼ? Chéen kʼaʼabéet a kʼáatik tiʼ›. ¿Suuk wa a beetik le baʼax tu yaʼalaj Jesusoʼ? ¿Baʼax ka kʼáatik tiʼ Jéeoba ken orarnakech?