Guirá fariseos ni goyoʼ ló xtzú Jesús buny xidal cós par nadziguiaʼ buñ layibu. Pal bunyibu cós tzaay, bunyibu láani par nadziguiaʼ buñ layibu. Goninéyibu Dios ro raguaʼ xidal buñ par nabiʼ guirá buñcu layibu. Bisuidyibu de memory tipnés oración ni nigolú sioʼol né ngúsi ngúsi goniʼyibu fuers lainy sinagogas né locay par nacadiag buñ layibu. Por ngú buñ bidziguiaʼ órni Jesús goniʼ: «Diti gonylo oración xomod rony fariseos. Layibu ronyibu pensary que Dios sadziguiaʼ portín xiroʼ ór raniʼyibu, per diti nacni scú. Ni looy guiniʼlo nosi Jehová né looy ganto láani. Diti guiniʼlo ngúca ngúca guirá ór. Jehová rioladx guiniʼlo ximod rasaclo».

 Jesús goniʼ ximodpa non guininéno Dios: «Bixiosdo ni noʼ lainy guibá, gac nayadit laalo. Guieed Gobierno xtunylo. Gac ni nálo lainy guibá né ló gudxlio». De ngú Jesús láaca góoch layibu que non nanabyibu galrro par cada dzú, nanabyibu natuidy Dios xcalkiéyibu scásiʼ, né nanabyibu stipnés cós ni caquiinyibu.

Jesús láaca goniʼ: «Dipa guisianlo guininélo Dios. Gonab cós tzaay a Jehová ni nac Bixioslo. Guirá buñ raniiny guiduidy cós tzaay xiin. Pal xiinlo ranab toib páa looy, ¿diti saduidylo toib guiee láabu ja? Né pal xiinlo ranab toib beel, ¿diti saduidylo toib beʼel láabu ja?».

Ór cú Jesús golexa ni ma goniʼ: «Pal nanlo rascadlo cós sacró xiinlo, ¡Bixioslo, Jehová nap más razón par guiduidybu espíritu santo looy! Golúsa looy non guinablo láani láabu». ¿Ronylo ni goniʼ Jesús la? ¿Xí ranablo Jehová órni raninélo láabu?