Yecu onongo pe twero cango lutwo ki cero jo muto keken, ento en bene onongo twero doro yamo ki kot. I nge lega i wi got, Yecu oneno ka Nam me Galilaya twagge matek. Lukwenane onongo gitye i yeya, kun gicanne ki kwangone pien yamo kodo bino i nyimgi. Yecu olor piny ci ocako wot i wii pii kun kemo yeyagi. I kare ma lukwena guneno ngat mo ka wot i wi pii, lworo omakogi matek. Ento Yecu owaco botgi ni: ‘Man an aye. Pe wulwor.’

Petero owaco ni: “Rwot, ka meno aye in, ci wek abin boti kunnu.” Yecu owaco bot Petero ni: ‘Bin bota.’ Pi meno, Petero oa woko ki i yeya owoto ki i wi pii ma tye ka twagge-ni kun cito bot Yecu. Ento i kare ma Petero dong oo cok bote, en oneno ka yamo kodo ci ocako doko lwor. En ocako lwiny woko i pii. Petero odange matek ni: “Rwot, lara do!” Yecu omako cinge ci owacci: ‘Pingo ibedo ki akalakala? Niyeni tye kwene?’

Ka dong Yecu ki Petero gudonyo i yeya, cutcut yamo ocako pye mot. Tika iromo goyo kit ma lukwena guwinyo kwede? Gin guwaco ni: “Ada, in giri i Wod pa Lubanga.”

Yecu pe onyuto tekone me doro yamo i nino meno keken. I nino mukene doki i kare ma Yecu ki lukwenane gitye ka ngolo nam me kato loka tungcel, Yecu ocito ka nino i tik yeya. I kare ma en onongo onino woko, yamo madwong ocako kodo. Pii otwagge ocorre i yeya, omiyo yeya ocako pong woko. Lukwena gucoyo Yecu kun gidange ni: ‘Lapwony, wato woko do! Konywa!’ Yecu oa malo ci owaco ki nam ni: “Ling, pye mot.” Cutcut, yamo ki nam oling mot. Yecu openyo lukwena ni: “Niyewu tye kwene?” Gin gucako lok i kingi kekengi ni: ‘Yamo wa ki nam giwinye.’ Lukwena gupwonyo ni ka guketo gengi ducu i kom Yecu, ci lworo myero pe omakgi i kom gin mo keken.