Yésu a bé la ndik bé mbuubaha bakokon ni tugul bawoga, a bé la ki mômôs mbebi ni gwel nop. A mal bañ soohe ngii hikôa, Yésu a suhul mis i béñge tuye Galiléa, a tehe mbuk mbebi. Baôma bé ba bé ikété môñgô, ba jok ni mbebi keñi. Yésu a sôs hikôa, a kahal ke ni makôô ngii malép inyu koba môñgô. Ngéda baôma ba bi tehe ngim mut i nke ngii malép, ba kon woñi ngandak. Ndi Yésu a kal bo le: ‘Me nu, ni kon bañ woñi.’

Ha nyen Pétrô a kal le: ‘A Nwet, ibale we toi nu, ti me oda le me loo me koba we.’ Yésu a timbhe le: ‘Lok.’ Mbuk mbebi a hôñôk ni ngui, Pétrô a pam môñgô, a bôdôl ke ngii malép inyu koba Yésu. Ndi ngéda a ba bebee ni Yésu, Pétrô a nun mbuk mbebi, a kahal sehla. Kiki a nôgda le a kahal yin, Pétrô a lond: ‘A Nwet, hôla me!’ Yésu a kabda nye woo, ndi a bat nye le: ‘Inyuki pééna i ngwéé we i ñem? Hee hémle yoñ i yé?’

Ngéda Yésu bo Pétrô ba bi jôp i môñgô, i nlélém ngéda, mbuk mbebi a mom nwee. Baa u nla hégda lelaa baôma ba bi nôgda i mbus mam mana? Ba kal nye le: “We u yé toi Man Nyambe.”

Ngélé bisu bé ini le Yésu a unda le a gwé ngui i ngii gwom kiki malép, nop, tole mbebi. Kel yada, ngéda Yésu ni banigil bé ba bé luk môñgô wap uu ngwañ tuye umpe, Yésu a ke a nañal i mbus môñgô, a kahal ke ’ilo. Ha nyen mbuk mbebi a bôdôl hôñ. Mangudga ma kahal pôgôs môñgô, môñgô u yon ni malép. Baôma ba ubul Yésu ’ilo, ba kal le: ‘A Lét, di yé bebee ni nyemb! Hôla bés!’ Yésu a telep, a kal tuye le: “Mom nwee!” I nlélém ngéda, mbebi ni tuye ba mom le nwee. Ha nyen Yésu a bat baôma le: ‘Hémle nan i yé hee?’ Ba kalna bo ni bo le: “Njee nye nunu le yak mbebi ni lom ba nôgôl?” Baôma ba bi sôk nok le, ibale ba nhémle Yésu, yom yo kiki yo y’a kôhna bé bo woñi.