Ndang holan pamalumhon na marsahit dohot pahehehon na mate Jesus. Alai boi do dipaso ibana badai. Dung sae Jesus martangiang di dolok, diida ibana ma sian i ro badai di Laut Galilea. Sai didayungi manang dilugai angka muridna ma parau i asa boi nasida sahat tu topi ni laut. Turun ma Jesus jala mardalan ma ibana di atas ni aek mandapothon nasida. Tingki diida angka muridna Jesus mardalan di atas ni aek, gabe mabiar ma nasida. Alai didok Jesus ma, ‘Unang mabiar hamu. Ahu do on.’

Didok si Petrus ma, ‘Tuan, molo ho do i, dokkon ma asa ro ahu tusi.’ Didok Jesus ma, ‘Ro ma ho.’ Turun ma si Petrus sian parau i, mardalan ma ibana di atas ni aek. Alai dung lam jonok, diida si Petrus ma badai na balga, gabe mabiar ma ibana. Gabe naeng maup ma ibana. Didok si Petrus ma, ‘Tuan, tolong jo ahu!’ Ditiop Jesus ma tanganna jala didok ma, ‘Boasa mabiar ho? Na so adong do haporseaonmu?’

Dung i naik ma Jesus dohot si Petrus tu parau i. Pintor so ma badai i. Boi do dibayangkon ho songon dia perasaan ni angka murid i? Didok nasida ma, ‘Tutu do ho Anak ni Debata.’

Ndang holan sahali i Jesus pasohon badai. Sada tingki, marlayar ma Jesus dohot angka muridna. Modom do ibana di parau i. Tompu ma ro badai. Gabe naeng balik ma parau i alani gogo ni alogo. Masuk ma aek tu parau i. Didungoi angka murid i ma Jesus. Didok nasida ma, ‘Guru, urupi jo hami. Nunga naeng balik hita!’ Dungo ma Jesus jala didok ma tu laut i, “So ma!” Pintor so ma alogo i jala tenang ma laut i. Didok Jesus ma tu nasida, ‘Na so adong do haporseaonmuna?’ Dung i ninna angka murid i ma, “Haru alogo dohot laut pe mangoloi do tu ibana.” Diboto angka murid i ma, molo porsea nasida tu Jesus, ndang porlu nasida mabiar.