Jesu ghaa mwẹ ẹtin na ya mu emwa egbe rran kevbe na ya huẹn emwa ni wulo kpaegbe. Gberra ọni, ọ vbe gha mwẹ ẹtin na ya dia ẹhoho kevbe amẹ. Jesu ghi na erhunmwu fo nẹ vbe uhunmwu oke, ọ na ke evba bẹghe Okun ọghe Galili vbe ogbigbi ẹhoho muẹn yo muẹn rre. Ọ ma zẹdẹ gha khuẹrhẹ ne avbe ukọ ọghe Jesu, ne iran sẹtin gua okọ ọghe iran rhunmwuda ẹhoho nọ ghaa la. Jesu keghi nana uhunmwu amẹ bu iran gha khian. Avbe ukọ ọghẹe ghi bẹghe ẹre wẹẹ, ọmwa khian vbe uhunmwu amẹ bu iran dee, ohan na gha mu iran. Sokpan Jesu keghi tama iran wẹẹ: ‘Mẹ nọ. Wa ghẹ gi ohan mu uwa.’

Ẹre Pita na kha wẹẹ: ‘Nọyaẹnmwa deghẹ uwẹ gele nọ, rhie ẹtin mẹ, ne I ya bu ruẹ gha dee.’ Jesu keghi wanniẹn e Pita wẹẹ: ‘Gha dee.’ Ẹre Pita na gele tuorre vbe nene okọ. Ọ na suẹn gha nana uhunmwu amẹ bu Jesu khian. Sokpan vbe Pita ghi miẹn ẹhoho nọ la, ohan kegha muẹn. Ọ na suẹn gha ziẹn ye uwu amẹ. Ẹre Pita na datu wẹẹ: ‘Nọyaẹnmwa, bu mwẹ rre!’ Vbe ọwarọkpa nii, Jesu keghi si ẹre obọ, ọ na tama rẹn wẹẹ: ‘Vbọsiẹ ne u na gbe awawẹ yi? Amuẹtinyan ruẹ kanmwa gbe.’

Vbe iyeke ọni, Jesu kevbe Pita na la uwu okọ. Vbe ọwarọkpa, ogbigbi ẹhoho nii keghi dobọ yi. Uwẹ rẹn vbene ekhọe ọghe avbe ukọ Jesu ghaa ye hẹ, vbe iran miẹn emwi ọyunnuan na ra? Iran keghi tama Jesu wẹẹ: “Ovbi Osanobua ẹre u gele khin.”

Ọ ghaa mwẹ ẹghẹ ọvbehe ne Jesu vbe ya dọ ogbigbi ẹhoho yọ. Asẹ ọkpa, vbe Jesu kevbe avbe ukọ ọghẹe ghi fian okun rra, Jesu keghi ya lovbiẹ vbe odẹ iyeke okọ ne iran ghaa ye. Vbe ọ ghi vbiẹ, ogbigbi ẹhoho na suẹn gha hoho. Okun nii kegha vba yo vba rre, amẹ na suẹn gha la uwu okọ ọghe iran. Ẹre avbe ukọ na ya huẹn Jesu vbe ovbe, iran na datu wẹẹ: ‘Nọyaẹnmwa, miẹn ima fan! Uwu ẹre ima miẹn na!’ Jesu ghi kpaegbe, ọ na tama okun wẹẹ: “Hunwan hii!” Ọwarọkpa nii, ogbigbi ẹhoho kevbe okun nọ te vba yo vba rre keghi dobọ yi. Jesu keghi nọ avbe ukọ ọghẹe wẹẹ: ‘Wa kue mwẹ amuẹtinyan?’ Ẹre iran na suẹn gha gu egbe iran guan wẹẹ: “Ẹhoho kevbe ogbigbi amẹ wa họn ẹmwẹ nẹẹn.” Avbe ukọ ọghe Jesu na do bẹghe ẹre wẹẹ, iran gha mu ẹtin yan Jesu, ohan emwi rhọkpa i khian mu iran.