E sega ni veivakabulai ga o Jisu se vakaturi ira na mate, e rawa ni lewa tale ga na cagi kei na uca. Ni masu oti ena ulunivanua, e raica sara na draki ca ena Wasa o Kalili. Eratou vodo tiko ena waqa na nona yapositolo qai dredre nodratou voce ena kaukaua ni cagi. E siro mai ulunivanua o Jisu qai taubale e delaniwai me volekata yani na nodratou waqa. Eratou rere na yapositolo ni ratou raica ni dua e taubale tiko ena delaniwai. Ia e kaya vei ratou o Jisu: ‘O yau ga qo, dou kua ni rere.’

E kaya o Pita: ‘Turaga, ke o kemuni dina, ni vakarota meu lako yani vei kemuni.’ E kaya vei Pita o Jisu: ‘Lako mai.’ E sobu mai waqa o Pita qai taubale vei Jisu ena delaniwai ni se draki ca tu. Ni voleka yani, e tuburi koya na rere ni raica na bula ni cagi, e mani dromu vakamalua. E kailavaka o Pita: ‘Turaga, ni vakabulai au!’ E taura na ligana o Jisu qai kaya: ‘Na cava o vakatitiqa kina? I vei nomu vakabauta?’

Erau vodo i waqa o Jisu kei Pita, mai ruru yani na draki ca. Ratou sa na qoroqoro mada ga na yapositolo. Eratou kaya: “O kemuni dina na Luve ni Kalou.”

A cakava tale qori o Jisu ena dua na gauna ni soko tiko kei ratou nona yapositolo ena tai ni wasawasa. Ni moce toka ena muaimuri ni waqa, e tubu mai e dua na draki ca vakadomobula. E caroba na ua ena baba ni waqa qai curu i loma na wai. Eratou vakayadrati Jisu na yapositolo, ratou kailavaka: ‘Qasenivuli, kere veivuke! Tou sa voleka ni mate!’ E duri o Jisu qai kaya ina wasawasa: “Mo maravu!” E ruru sara na cagi, e maravu tale ga na wasawasa. E tarogi ratou o Jisu: ‘I vei nomudou vakabauta?’ Eratou tukuna: “E talairawarawa mada ga vua na cagi kei na wasawasa.” Eratou vulica na yapositolo me ratou nuitaki Jisu, me ratou kua ni rerevaka e dua na ka.