E aki tii kona ni kamarurungia aoraki ao ni kautiia maate Iesu, ma e kona naba n taua aron te ang ao te karau. Ngke e tia n tataro Iesu i aon te maunga, e baraaki n taraa Namani Kariraia ao e nora te angibuaka ae korakora. A mena n te booti ana abotoro ao a kakorakoraia ni bwetua ma e kauntabaiia te ang. E ruo rikaaki Iesu ao e a nakonako i aon te ran nakon aia booti. Ngke a nora te aomata ae nakonako i aon te ran abotoro, ao a a maaku. Ma e taku Iesu nakoia: ‘Tai maaku bwa boni ngai.’

E taku Betero: ‘Te Uea, ngkana boni ngkoe, ao tuangai bwa N na nakoim.’ E taku Iesu nakoina: “Nakomai.” Ngaia are e a ruo man te booti Betero ao e nakonako i aon te ran nakon Iesu ma te buaka ae korakora. Ma ngke e a kaan Betero ma Iesu ao e a maaku ngke e nora korakoran te buaka. E namakinna Betero bwa e a moanna n iinako ao e takarua ni kangai: ‘Te Uea, kamaiuai!’ E taua baina Iesu ao e taku: ‘E aera ngkai ko nanououa? E nga am onimaki?’

Ngke a toka Iesu ma Betero i aon te booti ao e a rina naba n toki te buaka. Ko ataia bwa tera aia iango abotoro? A taku: “Bon te koaua bwa Natin te Atua ngkoe.”

Tiaki tii aei ana tai Iesu n taua taekani kanoan te bong. N te tai teuana, e toka n te booti ma ana abotoro nakon iteran te nama are teuana, ao e matu i bukin te booti. Ngke e matu, ao e roko te angibuaka ae korakora. A bwaro naao i aon te booti ao e a on n te ran. A kauta Iesu abotoro ao a tatakarua ni kangai: ‘Te tia Reirei, ti a kaani mate! Buokira!’ E teirake Iesu ao e taku nakon te nama: “Raoi!” E a toki naba te ang n te tai anne ao e a raoi. E titirakinia ana abotoro Iesu ni kangai: “E nga ami onimaki?” A taku i marenaia: “E ongo naba irouna te ang ao te nama.” A a ataia ngkanne abotoro bwa ngkana a onimakina raoi Iesu, a aki riai ni maaka te bwai teuana.