Jesus cha nid nume Chranki heile und Toti uferwecke, er cha au befehle was de Wind und de Rege sölled mache. Nachdem Jesus ufeme Berg betet het, gseht er, wies uf em Galiläische Meer stürmt. Sini Aposchtel sind i ihrem Boot und ruedered so fescht wie si chönnd gege de Wind und d Welle. Da gaht Jesus vom Berg abe und lauft uf em Wasser uf si zue. Wo d Aposchtel öpper uf em Wasser laufe gsehnd, verschrecked si und chömmed wahnsinnig Angscht über. Aber Jesus seit zu ihne: «Ich bins doch. Ihr müend kei Angscht ha.»

Da rüeft de Petrus zu ihm: «Herr, wenns würklich du bisch, denn mach, dass ich zu dir cha cho.» Da seit Jesus: «Chumm.» Und obwohls stürmt, stiigt de Petrus us em Boot. Er lauft Jesus uf em Wasser entgege. Wo er aber druf luegt, wie fescht dass es stürmt, chunnt er gliich plötzlich Angscht über. Er merkt, dass er untergaht und schreit: «Herr, hilf mir!» Jesus packt sini Hand und seit: «Werum zwiiflisch du eso? Hesch du eso wenig Glaube?»

Jesus und de Petrus stiiged is Boot ine und sofort hörts uf stürme. Chasch du dir vorstelle, wie sich d Aposchtel jetzt fühled? Si säged: «Du bisch würklich de Sohn vo Gott.»

Das isch nid s einzige Mal, wo Jesus sini Macht über d Natur zeigt. Wo Jesus und sini Aposchtel es anders Mal über de See segled, chunnt en gwaltige Sturm. D Welle schlönd a s Boot here und fülleds mit Wasser. Aber Jesus ligt hinde im Boot und schlaft. Da wecked ihn d Aposchtel und rüefed: «Lehrer, mir sterbed! Hilf üs doch!» Jesus staht denn uf und befihlt em See: «Bis still!» Sofort beruhiged sich de Sturm und d Welle. Jesus fragt d Aposchtel: «Wo isch nume eue Glaube?» Si säged zunenand: «Sogar de Wind und de See losed uf ihn.» D Aposchtel verstöhnd jetzt: Wenn si Jesus voll und ganz vertraued, müend si vor nüt Angscht ha.