Jesus kaa verukisa ovavere nokupendura ovakoke uriri, nungwari eye wina wa ri nouvara kombanda yombepo nombura. Tja za nokukumba kombanda yondundu, Jesus wa tara kOkuvare kwaGalilea na munu otjivepo. Ovaapostele ve vari mokayaha amave kondjo notjivepo otjizeu. Jesus wa heruka kondundu na utu okukayenda kombanda yomeva okuyenda kokayaha. Ovaapostele tji va muna omundu ngu ma kayenda kombanda yomeva, owo va tira tjinene. Posiya Jesus wa tja: ‘OwAmi amu tira!’

Petrus wa tja: ‘Muhona, tjinangara oOve tjiri, ndji raera kutja mbi ye kOve.’ Jesus wa raera Petrus na tja: ‘Indjo ku ami.’ Ngunda otjivepo amatji vingi, Petrus wa heruka mokayaha na utu okukayenda kombanda yomeva okuyenda ku Jesus. Posiya otja tjaa vaza popezu na Jesus, Petrus wa tara kotjivepo na utu okutira. Eye wa uta okuṱomwina. Petrus wa ravaera na tja: “Muhona ndji vatera!” Jesus we mu kambura keke, a tja: ‘Wa ivaivire tjike? Ongamburiro yoye i ri pi?’

Jesus na Petrus va ronda mokayaha, nu tjimanga otjivepo tja wa pehi. Ovaapostele mape ya vari noumune uṋe? Owo va tja: “Tjiri, oOve Omuna waNdjambi!”

Katjari otjikando atjiyerike Jesus tja tjaera otjivepo. Otjikando tjarwe, indu Jesus novaapostele ve tjaave hingi mokayaha okuyenda munda warwe, Jesus wa karara mokatuwo kokongotwe mokayaha. Ngunda a rara, peya otjivepo otjinamasa. Ozongazona za tona okayaha, nu okayaha ke urire omeva. Ovaapostele va pendura Jesus amave uru nave tja: “Tu yama, Muhona! Eṱe matu ṱu!” Jesus wa penduka na tja komuronga: ‘Porimana!’ Nu tjimanga otjivepo nomuronga wa porimana. Jesus wa pura ovaapostele na tja: ‘Ongamburiro yeṋu i ri pi?’ Owo va raerasana nave tja: ‘Nandarire ovivepo nomuronga vi puratena ku ye.’ Ovaapostele ve rihonga kutja tji va kambura mu Jesus nomutima auhe, owo kavena okuhepa okutira otjiṋa.