Jesus ukai semina ulih ngeraika orang ti sakit sereta ngangkatka orang mati idup baru tang iya mega ulih nguasa ribut enggau ujan. Pengudah iya besampi ba bukit, Jesus malik ke baruh ngagai Danau Galili, lalu tepedaka kabut. Bala rasul iya ba perau, bebendar bekayuh nanjak ribut. Jesus nurun ke baruh lalu berengkah bejalai ba atas ai mansang ngagai perau sida. Lebuh bala rasul meda bisi orang bejalai ba atas ai, sida nyadi takut. Tang Jesus madah ngagai sida: ‘Anang takut. Aku tu.’’

Saut Peter: ‘Tuan, enti nya amat nuan, asuh aku bejalai ngagai nuan.’ Ku Jesus: ‘Datai meh ngagai aku.’ Peter pansut ari perau lalu bejalai mansang ngagai Jesus ba tengah kabut nya. Tang lebuh iya majak semak enggau Jesus, Peter meda kabut nyau balat lalu iya nyadi takut. Iya ngasaika diri belabuh tengelam. Iya nyerauh: ‘Tuan, selamatka aku!’ Jesus nyambut jari iya, lalu nanya: ‘Nama kebuah nuan kakang ati? Ni pengarap nuan?’

Lebuh Jesus enggau Peter nepan perau, kabut teduh tekala nya. Ulih nuan ngambarka asai ati bala rasul maya nya? Ku sida: ‘Nuan endang Anak Petara.’

Ukai semina ba maya tu aja Jesus nguasa gaya hari. Bisi sekali, lebuh Jesus enggau bala rasul iya belayar ngagai seberai danau, Jesus tinduk ba belakang perau. Lebuh iya tinduk, kabut ti balat datai. Kabut mangka perau sida, lalu perau nya penuh enggau ai. Bala rasul ngerak Jesus lalu nyerauh: ‘Pengajar, kitai nyau deka mati! Tulung kami!’ Jesus angkat lalu ngerara gelumbang: ‘Diau jenuh!’ Tekala nya, ribut enggau gelumbang nya teduh. Jesus nanya bala rasul iya: ‘Ni pengarap kita?’ Sida bejaku enggau pangan diri: ‘Indah ribut enggau gelumbang ngasika iya.’ Bala rasul nemu enti sida arapka Jesus, sida enda ibuh takut enggau sebarang utai.