Orọnikọ ahwo nọ a be mọ gbe enọ i whu no ọvo Jesu ọ rẹ sai siwi jẹ kpare ze he, rekọ ọ rẹ sae kpọ ofou gbe oso. Ẹdẹjọ nọ Jesu ọ lẹ no evaọ ehru ugbehru, o te rri Abade Galili jẹ ruẹ nọ ofou ọgaga o bi fou yọ ẹkporo o bi fi. Ikọ riẹ a jọ okọ eva abade na be gwọlọ epanọ a sai ro bi te okpa. Jesu o te nwrotọ no ehru ugbehru na ze je muhọ ẹnya evaọ ehru ame na bi kpohọ obonọ okọ na ọ rrọ. Nọ ikọ na a ruẹ ohwo jọ nọ ọ be nya evaọ ehru ame na, ozọ u te mu ai. Rekọ Jesu ọ tẹ ta kẹ ai nọ: ‘Mẹ Jesu. Ozọ u mu owhai hi.’

Pita ọ tẹ ta kẹe nọ: ‘Olori, otẹrọnọ ginọ owhẹ, ta kẹ omẹ re mẹ nyabru owhẹ ze.’ Jesu ọ tẹ ta kẹ Pita inọ: ‘Nyaze.’ Pita o te nwrotọ no okọ na be nya ehru ame na bru Jesu evaọ udevie ofou gbe ẹkporo ọgaga na. Nọ Pita ọ nya kẹle Jesu no, o te rri ẹkporo na. Ozọ u te mu ei, o te muhọ ekiediwo. Pita o te bo nọ: ‘Olori siwi omẹ!’ Jesu ọ tẹ jobọ kru ei, ọ tẹ ta kẹe nọ: ‘Fikieme ozọ u ro mu owhẹ? Kọ ẹrọwọ ra ọ rrọ?’

Jesu avọ Pita a tẹ ruọ eva okọ na, ẹsiẹvo na abade na ọ tẹ fọ. Ẹvẹ who roro nọ oma o jọ ikọ na? Ikọ na a ta nọ: “Whẹ ginọ Ọmọ Ọghẹnẹ.”

Orọnikọ onana ọvo Jesu o ro ru ẹkporo avọ ofou serihọ họ. Evaọ oke ofa jọ, nọ Jesu avọ ikọ riẹ a je bi okọ kpohọ abọdekọ abade na, Jesu ọ tẹ wezẹ fihọ obọ emu okọ na. Nọ ọ be wezẹ na, ofou ọgaga o te muhọ efou. Ẹkporo ọ tẹ be tehe okọ na, ame o te mu okọ na họ ẹruọ. Ikọ Jesu a tẹ rọwo iẹe, je bo kẹe nọ: ‘Owuhrẹ, ewhu ma rrọ na! Fiobọhọ kẹ omai!’ Jesu ọ tẹ kpama jẹ ta kẹ abade na nọ: “Fọ!” Ẹsiẹvo na, ofou na o te serihọ, abade na ọ tẹ fọ. Jesu ọ tẹ nọ ikọ riẹ nọ: ‘Kọ ẹrọwọ rai ọ rrọ?’ Ikọ na a tẹ be ta kẹ ohwohwo nọ: “Makọ ofou gbe abade dede i bi yoẹme kẹe.” Ikọ na a wuhrẹ no oware nana nọ o via na ze inọ a te fievahọ Jesu riẹriẹriẹ, u du gwọlọ nọ a rẹ dhozọ oware ovo ho.