Li Jesus kiruuk xbʼanbʼal ebʼ li yaj ut xwaklesinkil chi yoʼyo ebʼ li kamenaq. Joʼkan ajwiʼ, kiruuk xxaqabʼankil li iqʼ ut li habʼ. Naq kiraqeʼk chi tijok saʼ li tzuul, kiʼilok taqʼa saʼ xjayal li palaw re Galilea ut kiril jun li kawil iqʼ. Ebʼ li Xʼapostol wankebʼ saʼ jukubʼ chiru haʼ ut yookebʼ xkʼebʼal xqʼe chi xbʼeresinkil ribʼ chi kaw chiru li kawil iqʼ. Tojaʼ naq li Jesus kiʼok chi bʼeek saʼ xbʼeen li haʼ re xtawbʼal ribʼ rikʼin li jukubʼ. Naq ebʼ li Apostol keʼril chi bʼeek jun li winq saʼ xbʼeen haʼ, kʼajoʼ naq keʼxuwak. Abʼan, li Jesus kixye rehebʼ: «Laaʼin. Mexxuwak».

Laj Pedro kixye: «Qaawaʼ, wi laaʼat, ye we naq tinxik chaatawbʼal». Li Jesus kixye re: «Kim!». Tojaʼ naq laj Pedro kikubʼeek saʼ jukubʼ ut xʼok chi bʼeek saʼ xbʼeen haʼ chi xtawbʼal li Jesus naq yook li kawil iqʼ. Abʼan, naq laj Pedro kiʼok chi nachʼok chixkʼatq li Jesus, kiril li kawil iqʼ, ut kixuwak. Kirekʼa naq kiʼok chi xik rubʼel haʼ ut kixjap re: «Qaawaʼ, kolin!». Kichapeʼk chi ruqʼ xbʼaan li Jesus ut kiyeeheʼk re: «Kʼaʼut xwiibʼank ru laachʼool? Ma maakʼaʼ aapaabʼal?».

Li Jesus ut laj Pedro keʼtaqeʼk saʼ li jukubʼ, ut li kawil iqʼ kixaqliik saʼ junpaat. Ma nakaakʼoxla chan tawiʼ ru keʼrekʼa ribʼ ebʼ li Apostol? Keʼxye: «Relik chi yaal naq laaʼat Ralal li Yos».

Moko kaʼaj tawiʼ saʼ li hoonal aʼin, li Jesus kiruuk xxaqabʼankil li kaqsut-iqʼ. Saʼ jun chik kutan, naq li Jesus ut ebʼ li Xʼapostol xkohebʼ saʼ li jukubʼ saʼ junpakʼal li palaw, warajenaq kikanaak li Jesus chirix li jukubʼ. Naq yook chi wark, kitiklaak jun li kawil iqʼ. Li ruqʼ raqʼ li haʼ naxpikʼa ribʼ chiru li jukubʼ, ut li jukubʼ kiʼok chi nujak chi haʼ. Ebʼ li Apostol keʼrajsi li Jesus rikʼin xjapbʼal rehebʼ ut keʼxye re: «Tzolonel, ok qe chi kamk! Tenqʼaho!». Li Jesus kiwakliik ut kixye re li palaw: «Matchoqin! Mat-ekʼank!». Saʼ li hoonal aʼan, li kawil iqʼ ut li palaw xeʼxaqliik. Tojaʼ naq li Jesus kixpatzʼ rehebʼ li Xʼapostol: «Ma inkʼaʼ tabʼiʼ wank eepaabʼal?». Ut aʼanebʼ keʼxye chiribʼilebʼ ribʼ: «Li iqʼ ut li palaw nekeʼabʼink ajwiʼ chiru!». Ebʼ li Apostol keʼxtzol naq, wi kʼojkʼokebʼ xchʼool rikʼin li Jesus, maakʼaʼ raj teʼxxuwa ru.