Jesu to kũhonia aahonagia andũ na akamariũkia, ĩndĩ nĩ aahotaga nginya gwatha rũhuho na mbura. Thutha wa kũhoya arĩ kĩrĩma-inĩ, nĩ aarorire Iria rĩa Galili na akĩona kĩhuhũkanio. Atũmwo ake maarĩ gatarũ-inĩ magĩgatwara na thĩna nĩ ũndũ wa kũhurutwo nĩ rũhuho. Jesu aaikũrũkire na akĩambĩrĩria kũgerera igũrũ rĩa maĩ athiĩte na kũrĩa gatarũ kaarĩ. Rĩrĩa atũmwo ake monire mũndũ akĩgera igũrũ rĩa maĩ, nĩ maamakire mũno. No Jesu aamerire ũũ: ‘Nĩ niĩ. Tigai gwĩtigĩra.’

Petero aamwĩrire ũũ: ‘Mwathani, angĩkorũo nĩwe, njĩra njũke.’ Nake Jesu akĩmwĩra: ‘Ũka.’ Nĩ ũndũ ũcio Petero akiuma gatarũ-inĩ na akĩambĩrĩria gũthiĩra igũrũ rĩa maĩ erekeire kũrĩ Jesu. No rĩrĩa aamũkuhĩrĩirie, aarorire kĩhuhũkanio na agĩtigĩra mũno. Aaiguire ambĩrĩria kũrikĩra. Aanĩrĩire akiuga: ‘Mwathani, honokia!’ Jesu aamũnyitire guoko akĩmwĩra: ‘Wambĩrĩria kũgĩa na nganja nĩkĩ? Wĩtĩkio waku ũrĩ kũ?’

Jesu na Petero nĩ maaingĩrire gatarũ-inĩ, na kĩhuhũkanio gĩgĩthira o hĩndĩ ĩyo. Ta hũũra mbica ũrĩa atũmwo maaiguire! Moigire ũũ: “Wee kũna ũrĩ Mũrũ wa Ngai.”

Rĩu to rĩo tu ihinda rĩrĩa Jesu aathire rũhuho. Nĩ kũrĩ hĩndĩ ĩngĩ maaringaga iria na atũmwo ake, na Jesu agĩkoma gatarũ-inĩ. Hĩndĩ ĩyo aarĩ toro, nĩ kwagĩire kĩhuhũkanio kĩnene. Makũmbĩ ma maĩ nĩ maahũrire gatarũ na gakĩgĩa maĩ. Atũmwo ake maamwanĩrĩire ũũ: ‘Mũrutani, tũrĩ hakuhĩ gũkua! Tũteithie!’ Jesu nĩ okĩrire na akĩra iria: “Horera!” O rĩmwe rũhuho rũu na iria ikĩhorera. Jesu oririe atũmwo ũũ: ‘Ũrĩ kũ wĩtĩkio wanyu?’ Nao makĩambĩrĩria kwĩrana: “O na rũhuho na iria nĩimũiguaga.” Atũmwo nĩ maamenyire atĩ mangĩehokire Jesu biũ, matiabataraga gwĩtigĩra kĩndũ o nakĩ.