Jezú ka kexile ngó ni kutena kua kusaka ni kufukununa o athu, maji ua kexile ue ni kutena kua kulanga o kitembu ni mvula. Kioso kia zubha kusamba ku mulundu, Jezú ua tale ku Kalunga ka Ngalileia, ua mono kitembu kia dikota. O jipoxolo jê ja kexile mu bhânga phala kuendesa o bote iâ. Jezú u bhixila iu ua mateka kuenda ku thandu a menha, phala kubhixila mu bote iâ. Kioso o jipoxolo kia mono muthu ua mu kuenda ku thandu a menha, uôma ua a kuata. Maji Jezú ua a ambela uixi: ‘Eme muene. Ki mu kale ni uôma.’

Phetele uambe: ‘Ngana, se eie muene, ngi tume ngi kusange koko.’ Jezú uambela Phetele: ‘Zá bhabha.’ Kienhiki, né muene ni kitembu kia dikota, Phetele ua tundu mu bote, anga ua mateka kuenda ku thandu a menha phala kusanga Jezú. Maji kioso kia kexile ku mu zukama, Phetele ua tale ku kitembu, uôma ua mu kuata. Muene ua mateka kuboba. Phetele u dikola uixi: ‘Ngana, ngi kudile!’ Jezú u sununa o lukuaku luê, u mu kuata, anga u mu ambela uixi: ‘Phata ia ku kuatela-hi? O kixikanu kiê kiala kuebhi?’

Jezú ni Phetele a dilongo mu bote, o kitembu kia tululuka. U tena kuxinganeka kiebhi kia divu o jipoxolo? Ene ambe: “Kidi kiene, eie u Mon’a Nzambi.”

Jezú ka bhange ngó kidiuanu kimoxi kia difu ni kiki. Mu kithangana kia mukuá, kioso o jipoxolo kia kexile mu kuenda njila, mu ku zaúka o kalunga, Jezú ua kexile mu zeka kudima dia bote. Kioso kia kexile mu zeka, kua mateka kitembu kia dikota. Katé ni mabhuku eza kuthandu a bote, iezalele ni menha. O jipoxolo a balumuna Jezú, anga a dikola exi: ‘Mesene, tua-nda fua! Tu kuatekese!’ Jezú ua balumuka anga uambela o kitembu: “Di xibhe!” Mu kithangana kienhokio, o kitembu ni kalunga, ka tululuka. Jezú uebhula o jipoxolo: ‘O kixikanu kienu kiala kuebhi?’ Ene a di fuetela mu diâ exi: ‘Hé, ni kitembu ni menha a kalunga a mu belesela.’ O jipoxolo a dilongo kuila, se a dielele kua Jezú ni muxima uoso, ene keji bhinga kukala ni uôma ua kima.