Yesu kakala kaka yo nkuma wa wuka yimbevo ko yo fula mafwa, kansi wakala mpe yo nkuma wa ningamesa tembwa ye mvula. Vava Yesu kamanisa samba vana mongo, watala muna mbu a Ngalili yo mona tembwa kia ngolo. E ntumwa zandi mu nzaza bakala, banuananga mu diatisa e nzaza muna tembwa. Yesu wakulumuka yo yantika diatila vana ntandu a maza yakuna kwakala e nzaz’au. Vava antumwa bamona muntu mosi wadiatilanga vana ntandu a maza, bamona wonga. Kansi Yesu wabavovesa vo: “I mono kwame, ke numoni wonga ko.”

Petelo wavova vo: ‘E mfumu, avo i ngeye kikilu, umpan’o nswa ngiza kwa ngeye.’ Yesu wavovesa Petelo vo: “Wiza.” Muna kuma kiaki, vana kati kwa tembwa, Petelo wakulumuka muna nzaza yo diatila vana ntandu a maza mu kwenda kwa Yesu. Kansi, ekolo kafinamanga, Petelo watala e tembwa yo mona wonga. Wayantika dimuka. Petelo wakaza vo: “E Mfumu, umpuluza!” Yesu wansimba muna koko yo vova vo: ‘Ekuma oyantikidi katikisa? Akweyi kwina o lukwikilu lwaku?’

Yesu yo Petelo bakota muna nzaza, vana vau e tembwa kianingama. Nga olenda yindula una antumwa bamona? Bavova vo: ‘Kieleka, ngeye kikilu i Mwan’a Nzambi.’

Ke wau ko i nkumbu antete Yesu kaningamesa tembwa. Lumbu kimosi, vava Yesu ye alongoki andi bayendanga ku sambu diankaka dia mbu, Yesu waleka kakala kuna nim’a nzaza. Ekolo kakala waleka, tembwa kiangolo kiayantika. Mavuku mayantika wandama muna nzaza yo kotesa maza muna kati. Antumwa basikamesa Yesu yo vova vo: ‘E mfumu, se tufwa. Utusadisa.’ Yesu wasikama yo vovesa o mbu vo: “Kal’e pi-i.” Vana vau, e tembwa ye mbu ulembamene. Yesu wayuvula ntumwa zandi vo: ‘Akweyi kwina o lukwikilu lweno’? Bavovazianini vo: “E tembwa yo mbu unwididi.” Antumwa balongoka vo avo babundidi kikilu e vuvu muna Yesu, ke bekala yo mfunu wa mona wonga wa konso diambu ko.