Yeˍsuˆ lehˬ naˬ ve chaw htaꞈ gu na˗e piˇ gʼa leh suh ve chaw htaꞈ kʼawꞈ teꞈ tu la piˇ gʼa ve awˬ hkʼoˆ kaꞈ, mvuhˇ haw mvuhˇ yeˬ htaꞈ kaꞈ jehˇ tcuh gʼa ve yoˬ. Yeˍsuˆ hkʼaw pui hkʼoˆ lo bon lawˬ peuˬ hkʼawꞈ nawˉ, yawˇ Gaˍliˍlehˇ gʼuiˬ po lo nyi peu ve teˇ yanˇ, mvuhˇ haw lonˉ laˬ chehˇ ve htaꞈ gʼa mawˬ ve yoˬ. Tcuh yaˇ hui haw loꞈ kʼoˍ gʼaꞈ ve mvuhˇ haw hpawˇ maˇ cawˇ ve pa taw heuˬ jaˇ. Yeˍsuˆ hkʼaw pui hkʼoˆ lo yaꞈ la leh iˉ kaˆ hkʼoˆ yawˇ hui geh juˇ kʼai ve yoˬ. Chaw teˇ gʼaˇ iˉ kaˆ hkʼoˆ juˇ laˬ chehˇ ve htaꞈ tcuh yaˇ hui gʼa mawˬ leh kawˆ ve yoˬ. Yaꞈ hkʼaˇ, Yeˍsuˆ kʼoˆ ve, “taˇ kawˆ, ngaˬ yoˬ.”

Peˍtruˆ kʼoˆ ve, ‘Saˍ laꞈ˗oˬ, nawˬ yoˬ kʼo, ngaˬ nawˬ geh iˉ kaˆ hkʼoˆ juˇ laˬ hpehꞈ˗aw laˇ?’ Yeˍsuˆ kʼawꞈ kʼoˆ piˇ ve, ‘laˬ˗oꞈ.’ Yaꞈ hkʼaˇ, mvuhˇ haw hehnˇ jaˇ ve htawˇ, Peˍtruˆ haw loꞈ kʼoˍ hkʼaw tawˆ˗e leh iˉ kaˆ hkʼoˆ Yeˍsuˆ geh juˇ kʼai ve yoˬ. Peˍtruˆ Yeˍsuˆ awˬ paˇ neˇ lo gaˬ˗e te htaˇ, yawˇ mvuhˇ haw htaꞈ nyi peu leh kawˆ ve yoˬ. Leh yawˇ iˉ kaˆ hkʼaw lo tuˍ loꞈ˗e tuˬ yoˬ tehꞈ dawˇ ve yoˬ. Yawˇ kuˬ leh kʼoˆ ve, ‘Saˍ laꞈ˗oˬ ngaˬ htaꞈ ga laˇ˗oˆ. Yeˍsuˆ Peˍtruˆ ve laꞈ sheh htaꞈ gʼawˬ leh kʼoˆ ve, ‘nawˬ aˬ htoꞈ ma te htawˇ dawˇ nawˬ dawˇ te ve le? Nawˬ hkʼa dehꞈ maˇ yonˍ leh laˇ?’

Yeˍsuˆ leh Peˍtruˆ haw loꞈ kʼoˍ hkʼaw loꞈ˗e htaˇ, mvuhˇ haw lonˉ jehˇ sheˍ ve yoˬ. Tcuh yaˇ hui hkʼaˬ hkʼe dawˇ ve htaꞈ nawˬ dawˇ mawˬ˗aw laˇ? Yawˇ hui kʼoˆ ve, “nawˬ lehˬ awˬ tehˬ awˬ na Gʼuiˬ sha ve Yaˇ hpu yoˬ.”

Chi lehˬ Yeˍsuˆ mvuhˇ haw mvuhˇ yeˬ htaꞈ jehˇ piˇ gʼa ve awˉ lawˉ teˇ pawˆ hpehꞈ ve maˇ heˆ. Teˇ pawˆ htaˇ, Yeˍsuˆ leh yawˇ ve tcuh yaˇ Gaˍliˍlehˇ gʼuiˬ po coˇ paˉ lo haw loꞈ kʼoˍ ciˇ kʼai ve yoˬ. Yeˍsuˆ haw loꞈ kʼoˍ awˬ mehˍ hpawˇ lo zuhꞈ chehˇ htaˇ, mvuhˇ haw lonˉ meuˆ laˬ leh gʼuiˬ baˇ teˇ hpaˍ haw loꞈ kʼoˍ htaꞈ htinˍ heuˆ leh iˉ kaˆ biˇ la ve yoˬ. Tcuh yaˇ hui Yeˍsuˆ htaꞈ kuˬ leh kʼoˆ piˇ ve, ‘Saˍ laꞈ˗oˬ, ngaˬ hui suh la paˇ neˇ ve yoˬ. Ngaˬ hui htaꞈ a ciˉ ga laˇ˗oˆ.’ Yeˍsuˆ tu la leh mvuhˇ haw htaꞈ deˇ piˇ leh, gʼuiˬ po htaꞈ “taꞈ iˉ gawˬ lehˍ chehˇ˗oˆ” tehꞈ kʼoˆ piˇ ve yoˬ. Mvuhˇ haw dehˬ kʼai leh, taꞈ iˉ gawˬ lehˍ chehˇ sheˬ ve yoˬ. Peuˬ leh Yeˍsuˆ tcuh yaˇ hui htaꞈ kʼoˆ piˇ ve, ‘nawˬ hui yonˍ ve hkʼaˬ hkʼe kʼai peuˬ ve le? Yawˇ hui kʼoˆ daꞈ ve, ‘mvuhˇ haw leh laˇ tsuhˇ gʼuiˬ htawˇ yawˇ ve hkawˇ na yuˬ ve yoˬ.’ Tcuh yaˇ hui gʼa shiˍ ve, yawˇ hui Yeˍsuˆ htaꞈ gʼaˇ hkʼa dehꞈ va ve kʼo, teꞈ chiˉ kawˆ tuˬ maˇ cawˬ.