Yesu kādipo’tu’nka na bukomo bwa kubelula babela ne kusangula bafwe kete, inoko kadi wādi ne na bukomo bwa kwimika kivula ne mvula. Yesu pa kupwa kulombela ku lūlu, wātadile pa Dijiba dya Ngadilea wāmona kimpumpu. Batumibwa bandi bādi mu bwato, papo bēkonda na kuvuwa bakandija mwiya kivula. Yesu wātūka, wāanza kulandala pa mema wenda kobadi. Batumibwa pa kumona muntu ulandala pa mema, bāzakala. Ino Yesu wēbalombola’mba: ‘I amiwa. Kemwakikwatwai moyo.’

Petelo wānena’mba: ‘Mfumwami, shi bine i abewa, nankyo nene nami ngiye kodi.’ Yesu wālombola Petelo amba: ‘Iya.’ Ebiya Petelo wātūka mu bwato kālandala pa mema wenda kudi Yesu mu kino kimpumpu. Inoko Petelo pa kufwena kudi Yesu, wātala mwiya kimpumpu, wākwatwa moyo. Wāshilula kushika. Petelo wāela lubila’mba: ‘Mfumwami, mpandije!’ Yesu wāmukwata ku kuboko, na kumunena’mba: ‘Mwanda waka wādi kotatana? Le lwitabijo lobe ludi kwepi?’

Ba Yesu ne Petelo pa kukanda’tu mu bwato, kimpumpu kyāketeka ponka na ponka. Le batumibwa bēivwene namani? Bānenene amba: “Bine abe wi Mwanā Leza.”

Yesu kātalejepo kivula enka uno musunsa kete. Difuku dikwabo, Yesu ne batumibwa pobādi benda bukila bwa dijiba lwa bwato, Yesu wāendele kukalāla kunyuma kwa bwato. Paādi ulēle, kimpumpu kikatampe kyātetuka. Mantanki a mema kēatwela mu bwato, kadi mu bwato mwayula mema. Batumibwa bālangula Yesu na mabila’mba: ‘Mufundiji, tubafu! Witukwashe!’ Yesu wālanguka, wānena dijiba’mba: “Talala nyā!” Ponka na ponka, kivula ne dijiba byātalala’tu nyā. Yesu wāipangula batumibwa amba: ‘Le lwitabijo lwenu ludi kwepi?’ Kēbeneneja abo bene na bene amba: “Enka ne kivula ne dijiba dine bimukōkela.” Batumibwa bēfundile amba shi bakulupile Yesu bininge, kebakekalapo na kya kukwatyilwa moyo.